Kásipkerlikti jappaı damytý baǵdarlamasy eki kúnnen keıin bastalady - mınıstr Súleımenov

ASTANA. QazAqparat - QR Ulttyq ekonomıka mınıstri Tımýr Súleımenovtyń aıtýynsha, jańa baǵdarlama aıasynda kez kelgen kásipke nesıe alýǵa bolady. 

Al kepildiktiń 50-85 paıyzyn memlekettik ózi qamtamasyz etedi. Oǵan bir tıyn da shyǵarýdyń qajeti joq, dep xabarlaıdy QazAqparat tilshisi.

"Nátıjeli jumys pen jappaı kásipkerlikti damytý baǵdarlamasy sáýirdiń 1-inde bastalady. Atalǵan baǵdarlama úsh baǵytta júzege asady. Birinshiden, ol - nesıelendirý. Onyń aıasynda óz bıznesin endi ǵana bastap jatqan kásipker bolsyn, bıznespen burynnan beri aınalysatyn adam bolsyn, kásipkerlikke zaım ala alady. Aıta keter jaıt, ol zaımdy kez kelgen kásipke alýǵa múmkindik bar. Nesıeniń shekti kólemi - 18 mln. teńge. Al stavkanyń mólsheri 6 paıyz bolady, bul - sońǵy ári naqty stavka. Budan artyq shyǵyn shyqpaıdy", - dep atap kórsetti Súleımenov búgingi baspasóz máslıxatynda.

Mınıstrdiń sózine qaraǵanda, aǵymdaǵy jylda qalalarda jappaı kásipkerlikke 10 mlrd. teńge bólinse, aýyldar men shaǵyn qalalarda 27 mlrd. teńgeniń nesıelerin berý kózdelip otyr. "Árıne, nesıe alǵanda kepilzat máselesiniń týyndaıtyny belgili. Biz ony jaqsy bilemiz. Sondyqtan jańa baǵdarlama aıasynda nesıeniń 85 paıyzyna memlekettiń ózi kepildik jasaıdy. Ol - óz kásibin endi bastap jatqan bıznesmenderge arnalǵan sharttar. Al burynnan beri aınalysatyndarǵa 50 paıyzdyq kepildik qarastyrylǵan. Kepildikke eshqandaı aqsha alynbaıdy. Kásipkerler úshin qyzmettiń túri tegin bolady. Osyny erekshe atap ótkim kelip otyr", - dep atap kórsetti mınıstr.