Kásipkerlikti qoldaý baǵytynda keshendi sharalar alynatyn bolady - BQO ákimi
ORAL. QazAqparat - Batys Qazaqstan oblysynda kásipkerlikti qoldaý men qorǵaý, ákimshilik kedergilerdi joıý baǵytynda keshendi sharalar alynatyn bolady.
Bul týraly BQO ákimdigi men oblys prokýratýrasynyń alqa májilisi jáne óńirlik kásipkerler palatasynyń kásipkerler quqyǵyn qorǵaý boıynsha keńes otyrysynda oblys ákimi Altaı Kólginov málim etti, dep habarlaıdy «QazAqparat» tilshisi.
Qazaqstan kásipkerleriniń quqyǵyn qorǵaý boıynsha ókil Bolat Palymbetov, «Atameken» Ulttyq kásipkerler palatasy qoǵamdyq monıtorıng jáne ákimshilik kedergilerdi azaıtý departamentiniń dırektory Erbol Ústemirovtiń qatysýymen ótken jıynda oblys basshysynyń baıan etkenindeı, óńirde Elbasy tapsyrmasyna sáıkes kásipkerlikti qoldaý, ishki jalpy ónimdegi, bıýdjetke túsetin salyqtaǵy shaǵyn jáne orta bıznestiń úlesin odan ári molaıtý jolynda naqty qadamdar qolǵa alynýda. Mundaı jumystar kásipkerlikti qorǵaý, ákimshilik kedergilerdi joıý, sybaılastyq jaǵdaıattaryn boldyrmaý syndy úsh baǵytta júrgizilýde. Bul rette kásipkerler qaýymdastyǵy jáne quqyq qorǵaý organdarymen birlese qyzmet atqarýdyń tıimdiligi kúmán týdyrmaıdy. Aldymen jergilikti atqarýshy organdar men tıisti mekemeler oblystyq jáne aýdandyq kásipkerlerge qyzmet kórsetý ortalyǵynda «Bir tereze» qaǵıdaty boıynsha belgilengen merzimde qujat qabyldap, kásipkerlerge keńes berip, naqty jumys jasaýy kerek. Óńir basshysynyń oblystyq kásipkerler palatasynda apta saıyn kásipkerlerdi qabyldap júrgeni málim. Endeshe, qala, aýdan ákimderi de osylaı jasaýy tıis. Kásipkerliktiń damýyna kedergi keltirgen barlyq memlekettik organ qyzmetkerleri sol úshin jaýap beretin bolady. Eń bastysy, kásipkerler kabınetterdi jaǵalap nemese basqarma, departamentterdi aralap, sendelip júrmeı, jumystaryn tez bitirýi tıis. Ákimshilik kedergilerdi joıý maqsatynda QR Ulttyq ekonomıka mınıstrligimen birge kásipkerlik salasynda memlekettik qyzmetterdi avtomattandyrý úderisi engizilýde. Sondaı-aq «Taza qoldar» atty pılottyq joba júzege asyryla bastady. Kásipkerlikti damytý baǵytynda jumystyń ashyqtyǵy men jarııalylyǵyn qamtamasyz etý baǵytynda da tıisti sharalar atqarylýda.
Otyrysta sondaı-aq oblys prokýrory Saparbek Nurpeıisov óńirlik kásipkerler palatasymen birlese otyryp, ákimshilik kedergilerdi anyqtaý jáne joıý boıynsha josparly jumys júrgizilip jatqanyn jetkizdi. Mysaly, 2016 jyly prokýratýra organdary jeke kásipkerlik nysandarynyń quqyǵyn qorǵaý baǵytynda 12 tekseris júrgizip, sonyń nátıjesinde 117 zańbuzýshylyqty anyqtady. Ony joıý úshin 36 prokýrorlyq yqpal etý aktileri engizilip, 19 adam tártiptik jáne ákimshilik jaýapkershilikke tartyldy. 146 kásipkerdiń quqyǵy qorǵaldy. BQO boıynsha ekonomıkalyq qylmystardyń tirkelýi eki ese azaıdy (2016 jyly - 77, 2015 jyly - 108, 2017 jylǵy birinshi toqsanda - 12, ótken jylǵy osy merzimde - 32). Jalpy alǵanda, oblysta sońǵy bes jylda bıznesti tekserý úsh esege qysqardy (2011 jylǵy 9998-den 2016 jylǵy 3279-ǵa deıin).
Degenmen bıznestiń damýyna teris áserin tıgizetin kedergiler de az emes. Bular - memlekettik organdar men kásiporyndardyń tóreshildigi, jasandy ákimshilik kedergiler jasaý, negizsiz júrgiziletin tekserýler, sapasyz memlekettik qyzmet kórsetý, ákimshilik jaýapkershilikke zańsyz tartý jáne basqalar. Munyń bárin durystaý úshin keshendi sharalar júrgizý qajet. Osyǵan oraı arnaıy jospar bekitilip, jumys jasalatyn bolady.
