Kásipkerlikti damytý josparlary keshiktirilmeýi kerek- Baqytjan Saǵyntaev
Úkimet otyrysynda QR Ulttyq ekonomıka vıtse-mınıstri Rýslan Dálenov 2018 jyly 24 mamyrda Memleket basshysy Kásipkerlik qyzmetti retteýdi jetildirý máseleleri týraly zańǵa qol qoıylǵanyn atap ótti. Onyń aıtýynsha, osy zań sheńberinde júrgizilgen reformalardyń mańyzyn eskerip, onyń sapaly iske asyrylýyna basa nazar aýdarý kerek.
«Úkimet reglamentiniń talaptaryna sáıkes osy jyldyń 29 mamyrynda Premer-Mınıstr Keńsesine Sizdiń (Úkimet basshysyna - avt.) ókimińizdiń barlyq memlekettik organdarmen kelisilgen jobasy usynyldy. Oǵan zańdy iske asyrý úshin qabyldaý qajet normatıvtik-quqyqtyq aktilerdiń tizbesi bekitiledi», - deıdi vıtse-mınıstr.
Vıtse-mınıstrdiń aıtýynsha, zańdy iske asyrý úshin 146 zańǵa táýeldi normatıvtik quqyqtyq aktileri qabyldanýy tıis. Onyń ishinde «Doing Business» reıtıngindegi Qazaqstannyń pozıtsııalaryn jaqsartý maqsatynda 24 normatıvtik quqyqtyq aktiler qabyldaý zor mańyzǵa ıe.
«Zańdy keńinen túsindirý jumystaryn júrgizilýde. Osy tapsyrmańyzdy oryndaý maqsatynda 8 maýsymnan bastap Pavlodar, Kókshetaý, Almaty, Aqtóbe qalalarynda jaqyn jerdegi óńirlerdi tarta otyryp, kásipkerler arasynda aqparattyq-túsindirý is-sharalaryn júrgizdik. Atalǵan jumysqa jergilikti atqarýshy organdardyń, Bas prokýratýranyń, «Atameken» ulttyq kásipkerler palatasynyń jáne onyń óńirlik palatalarynyń ókilderi, bıznes-qaýymdastyqtar, sondaı-aq bıznestiń óz ókilderi qatysty», - dedi ol.
Otyrys barysynda kásipkerlikti damytýǵa jaýapty basshylardyń baıandamasyn tyńdaǵan Baqytjan Saǵyntaev Úkimet múshelerine zańdy iske asyrýǵa basa mańyz berýdi tapsyrdy.
«Merzimderin (zań boıynsha josparlar merzimin - avt.) taǵy bir ret qarap shyǵý kerek. Qazir Qanat Aldabergenuly (Bozymbaev - avt.) «Atalǵan zańdar qarasha aıynda qabyldanady» dep aıtyp jatyr. Taǵy da jarty jyl kútip júremiz. Ne sebepti, uzaq ýaqyt kútý kerek. Sheshim qabyldandy. 24 mamyrda jarııa túrde qol qoıyldy. Odan beri 1 aı ótti. Biz endi ǵana kesheýildetip bizdiń josparymyzdy qabyldap jatyrmyz. Al mınıstrlikter tarapynan qabyldanatyn normatıvtik-quqyqtyq aktter jyldam túrde ótýi kerek. Búkil merzimderin usynylǵan keste boıynsha qaıta qarańyzdar. Ekinshiden, sapaly túrde qabyldanatyn bolsyn. Keshe issaparda bolǵan kezde Aqmola oblysynda kásipkerler kóptegen usynystar aıtty. Erbolat Áskerbekuly, (Dosaev, QR Úkimet basshysynyń orynbasary - avt.), qosymsha jıyntyǵyn alyp, taǵy da usynystardy qaraý kerek», - dedi Úkimet basshysy óziniń orynbasaryna qarata aıtqan sózinde.
