Kásipkerlikke janashyrlyq tanytpaıynsha, istiń alǵa basýy ekitalaı - Májilis depýtaty Almas Tortaev
ASTANA. 8 aqpan. QazAqparat /Aıdar Ospanadıev/ - «Memleket kásipkerlik salasyn damytýǵa barynsha kúsh salyp otyr.
Bul baǵytta memleket tarapynan jasalyp jatqan jeńildikter az emes. Degenmen kásipkerlik salasyn qoldaýda sheshimin kútken máseleler de jetkilikti»,-deıdi Májilis depýtaty Almas Tortaev. Bul týraly ol búgin Astanada ótken «Bıznesti qorǵaý - memlekettiń damý joly» atty dóńgelek ústel otyrysynda aıtty.
Onyń pikirinshe, kásipkerlikti qoldaý salasynda, ásirese, qadaǵalaýshy, baqylaýshy, sondaı-aq salyq organdarynyń túsinistigi asa qajet.
Bular bıznespen tikeleı qarym-qatynasta jumys isteıtin organdar. «Sondyqtan atalmysh organdarǵa óz isinde kemshilik jibergen kásipkerdi nemese bıznes ókilin bas salyp jaýapqa tartyp, aıyppul sala bergenshe, istiń mán-jaıyn túsindirip, kásipkerdiń qandaı kemshilik jibergendigin jáne onyń sońy nege aparyp soqtyratynyn túsindirip otyrsa, bul kásipker azamattar úshin úlken qoldaý bolar edi. Kásipkerler osy arqyly óz kemshiligin túzeýge, bolashaqta zardabyn tartatyn áreketterge jol bermeýge tyrysatyn edi»,-deıdi halyq qalaýlysy.
Onyń sózinshe, kásipkerlikke osyndaı joldarmen janashyrlyq tanytpasa, osyndaı tásilderdi qoldana otyryp, kásipkerliktiń damýyna úles qospasa, istiń ári qaraı jyljýy qıyn. «Al bıznesti damytý isin bizge Memleket basshysynyń ózi júktep otyr. Sondyqtan bizge kásipkerlik salasyna degen kózqarasty ózgertý kerek»,-dedi A.Tortaev.
