Kásipkerlikke zańsyz aralasatyn memqyzmetshilerdiń jaýapkershiligi kúsheıtiledi
ASTANA. QazAqparat - Kásipkerlik isine zańsyz aralasatyn memlekettik qyzmetshilerdiń jaýapkershiligi kúsheıtiledi. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev aıtty, dep habarlaıdy QazAqparat.
«Zańdarymyz durys. Ony búkil halyqaralyq uıymdar moıyndaıdy. Biraq, óz ókilettikterin asyra paıdalanýǵa tyrysatyn sheneýnikter áli de bolsa jetip artylady. Osyǵan baılanysty agenttik qyzmetiniń negizgi basymdyǵy bıznesti qoldaý jáne qorǵaý boldy jáne bolyp ta qala beredi. Biz bızneske zańsyz aralasyp, qysym kórsetetin alaqol memlekettik qyzmetshilerdi anyqtaımyz. Ótken jyly mundaı 352 faktiniń joly kesildi. Bul 2016 jyldyń kórsetkishinen úshten birge kóp», - dedi agenttik basshysy Sybaılas jemqorlyqqa qarsy is-qımyl máseleleri jónindegi ekinshi respýblıkalyq kásipkerler forýmy barysynda.
Onyń aıtýynsha, qabyldanǵan sharalar 270-ten astam kásipkerdiń quqyǵyn qorǵaýǵa múmkindik bergen.
«Oryn alǵan jaǵdaıdy eskere otyryp biz kásipkerlik qyzmetine laýazymdy tulǵalardyń zańsyz aralasýyna qarsy is-qımyldyń quqyq qoldaný aspektilerine júıeli saraptama jasaýdy jáne olardyń jaýapkershiligin kúsheıtýdi josparlap otyrmyz», - dedi agenttik basshysy.
Sonymen qatar Alık Shpekbaev 2017 jyly agenttik pen «Atameken» ulttyq kásipkerler palatasy arasynda atqarylǵan jumys kóp baǵytty qamtyǵan betburystarǵa toly bolǵanyn basa aıtty.
«Biz úlken nátıjelerge qol jetkizdik, bıznestiń boıyn kóterip, ary qaraı damýyna kúsh-jiger beretin ortany qalyptastyrýdy bastadyq. Bul degenimiz biz úshin úlken jetistik. Osy rette odan arǵy oń ózgeristerge kedergi keltiretin máselelerdiń bar ekendigin de jasyrmaımyz. Olardy azaıtyp, tipti joıý úshin aǵymdaǵy jyly bar kúshimizdi salamyz. Maqsatymyzǵa jetetinimizge senimimiz zor, buǵan bizdiń barlyq múmkindikterimiz bar. Eń bastysy Elbasymyz, halqymyzdyń jáne bıznes-qaýymdastyqtyń koldaýy bar dep senemin», - dep túıindedi sózin Alık Shpekbaev.
