Kásipkerlik týraly zań der kezinde ózgerdi - Qazaqstannyń Eńbek Eri Saıran Buqanov
QOSTANAI. QazAqparat - Qostanaılyq agrarshylar kásipkerlik týraly jańa zańdy talqylady, dep habarlaıdy «QazAqparat» HAA tilshisi.
Buǵan deıin habarlaǵanymyzdaı, QR Premer-Mınıstri Baqytjan Saǵyntaev Qostanaı oblysyna jumys saparymen kelip, jergilikti kásipkerlermen kezdesti.
Jıyn barysynda jaqynda Prezıdent jarııa túrde qol qoıǵan «QR keıbir zańnamalyq aktilerine kásipkerlik qyzmetti retteýdi jetildirý máseleleri boıynsha ózgerister men tolyqtyrýlar engizý týraly» Zańdy talqylady. Tájirıbeli sharýalar jańa zań áýeli erkin kásipkerlikke jol ashady dep otyr. Qazaqstannyń Eńbek Eri Saıran Buqanovtyń aıtýynsha, kásipkerlik týraly zań der kezinde ózgerdi.
«Ózderińiz bilesizder, Elbasy bıznes shyǵyndaryn jappaı tómendetý jóninde zańda qarastyrylǵan sharalar men básekege kedergi keltiretin normalardyń alynyp tastalǵany týraly aıtty. Biz buny birneshe jyl boıy kúttik. Der shaǵynda sheshim qabyldap, kásipkerlerge múmkindik ashqan Nursultan Ábishulyna alǵysymyz sheksiz. Endi fermerlerimiz qaǵazbastylyqtan arylyp, erkin kásipke umtylýy tıis», - dedi Saıran Buqanov basqosý barysynda. - Men qyryq jyldan astam ýaqyt «Qarqyn» sharýa qojalyǵyn basqardym. Memleket toqsanynshy jyldary jer týraly úlken reforma jasady. Árkim jekege ketti. Keńshar bólindi. Men de bólinip shyqqym keldi. Dál sol ýaqyttarda Memleket basshysy oblysqa kelip, bizdiń sharýashylyqta boldy. Ol kisi egis alqabyn dıversıfıkatsııalap, egistikke maıly daqyldardy kirgizý kerektigin aıtty. Mine, Elbasynyń sol usynysy arqyly kásibimizdiń jemisin kórip kelemiz».
Tájirıbeli dıqannyń sózine qulaq túrsek, aýyl sharýashylyǵy salasynda sheshilmegen máseleler áli de jeterlik.
«Elde kombaın, traktorlar kóptep shyǵarylady da, onyń qosalqy bólshekterin qurastyratyn zaýyttar joq. Dala jumysyna salynatyn tehnıkalar buzylmaı turmaıdy. Olarǵa tehnıkalyq servısterden ótkizip, jóndeý qajettigi týyndaǵanda biraz qınalyp qalamyz. Tipti, qarapaıym rezeńke bólshekter, dıskatorlar, tyrmalar, kýltıvatorlar jetpeı jatady. Fermerler osy atalǵan qurylǵylardy Reseıden nemese muhıttyń arǵy jaǵynan aldyrtady. Bul qomaqty qarajatty talap etetini aıtpasa da túsinikti. Mysaly, kúndelikti paıdalanatyn egin sepkish qurylǵyny batys elderinen aldyrǵanda reseılik zaýyttardaǵy baǵadan 3 ese qymbat tóleımiz. Osy baǵytta memleketten qoldaý kútemiz», - degen usynysyn aıtty Saıran Buqanov Úkimet basshysyna.
Qozǵalǵan máselelerge qatysty Aýyl sharýashylyǵynyń birinshi vıtse-mınıstri Arman Evnıev túsinik berdi. Onyń aıtýynsha, aýylsharýashylyq qosalqy bólshekter shyǵarý úshin bilikti kadrlar qajet. Aldymen osy saýal sheshimin tapsa, elde qosalqy bólshekterin qurastyratyn zaýyttardyń qatary kóbeıedi.
Jıynda belgili bolǵandaı, Baqytjan Saǵyntaevtyń tapsyrmasy boıynsha aýyl sharýashylyǵy tehnıkalary men qosalqy bólshekterin shyǵarý máselelerin Aýyl sharýashylyǵy mınıstrligi basqa memlekettik organdarmen birlesip qarastyrmaq.
