Kásipkerlik sýbektileriniń sany 8 paıyzdan astam ósti - Qarjy mınıstrligi
NUR-SULTAN. QazAqparat - Orta jáne shaǵyn kásipkerlik sýbektileriniń sany 1,2 mıllıonǵa jetti. Bul týraly QR Parlamenti palatalarynyń birlesken otyrysynda 2018 jyly respýblıkalyq bıýdjettiń atqarylýy týraly esepti tanystyrý kezinde QR Premer-Mınıstriniń birinshi orynbasary-Qarjy mınıstri Álıhan Smaıylov málim etti, dep habarlaıdy QazAqparat tilshisi.
«Bıznestiń jol kartasy-2020» baǵdarlamasy aýqymynda orta jáne shaǵyn bıznestiń 2 myńǵa jýyq jobasyna qoldaý kórsetildi.
Kásipkerlik negizderine 23 myń adam oqytyldy. 2019 jyldyń 1 qańtarynda jumys istep turǵan orta jáne shaǵyn kásipkerlik sýbektileriniń sany 1,2 mıllıonǵa jetti. 2018 jyldyń basymen salystyrǵanda, ol 8,3 paıyzǵa ósti», - dedi Smaıylov.
Budan bólek ol «Eńbek» baǵdarlamasy sheńberinde 42 myń adam tehnıkalyq jáne kásiptik bilimmen qamtylǵanyn atap ótti.
«Bastaý-Bıznes» jobasy boıynsha 28 myń kásipker oqýdan ótti.
Mıkrokredıt alýshylardyń esebinen qosymsha 12,6 myń jumys orny ashyldy.
«Memleketti damytý úshin mańyzdy rol atqaratyn salalardyń biri - ol bilim salasy. Ótken jyly osy sala 474 mlrd teńgege qarjylandyryldy. 2018 jyly balabaqshalardyń sany 10 314-ti qurady nemese 2017 jylmen salystyrǵanda 551-ge kóbeıdi. Ol 3-6 jastaǵy balalardy mektepke deıingi bilimmen 95,2 paıyz deńgeıinde qamtýǵa múmkindik berdi. 62 mektep paıdalanýǵa berildi», - dedi Úkimet basshysynyń birinshi orynbasary.
Onyń sózine qaraǵanda, densaýlyq saqtaý salasyna 1 trln 71 mlrd. teńge bólindi. Onyń 955 mlrd teńgesi halyqty kepildendirilgen tegin medıtsınalyq kómekpen qamatamasyz etýge baǵyttaldy. Nátıjesinde, qan aınalymy júıesi aýrýlarynan bolatyn ólim-jitim 4,3 paıyzǵa tómendedi; qaterli isikterden ólim 2,5 paıyzǵa azaıdy. 4 mln 905 myń adam vaktsınatsııadan ótti.
