Kásipkerlik salasyndaǵy jańa tásilder talqylandy

NUR-SULTAN. QazAqparat – QR Bas prokýratýrasynyń Quqyqtyq statıstıka jáne arnaıy esepke alý jónindegi komıteti beınekonferentsııa baılanysy arqyly jańa retteýshilik saıasatty engizý, bızneske qoıylatyn artyq talaptardy qysqartý, sondaı-aq memlekettik baqylaýdy avtomattandyrý máseleleri boıynsha jumys keńesin ótkizdi, dep habarlaıdy QazAqparat.

Keńes jumysyna ortalyq memlekettik jáne jergilikti atqarýshy organdardyń, «Atameken» Ulttyq kásipkerler palatasynyń ókilderi, sondaı-aq komıtettiń aýmaqtyq basqarmalarynyń basshylary qatysty.

Jumys barysynda «taza paraqtan» retteýdi engizý aıasynda kásipkerlik salasyndaǵy jańa tásilder talqylandy.

Atap aıtqanda, Memleket basshysynyń tapsyrmasyn oryndaý aıasynda memlekettik organdar bızneske qoıylatyn talaptardy qysqartý jáne memlekettik baqylaý protsesin avtomattandyrý boıynsha aýqymdy jumys júrgizýde. Bul baqylaýshy organdardyń jumysyn jeńildetýge, sondaı-aq bıznes sýbektilerine ákimshilik júktemeni azaıtýǵa múmkindik beredi.

«Atameken» Ulttyq kásipkerler palatasynyń ókilderi kásipkerlerge qoıylatyn talaptardy qysqartý boıynsha qyzmettiń túrli salalaryndaǵy jumys týraly habardar etti. Tótenshe jaǵdaılar mınıstrliginiń ókilderi táýekelderdi basqarý júıesin avtomattandyrý boıynsha jumys tájirıbesi týraly baıandady.

Qazirgi tańda Komıtet memlekettik organdar júzege asyratyn baqylaý men qadaǵalaýdyń barlyq nysandarynyń úılestirýshisi bolyp tabylady.

Sonymen qatar, Kásipkerlik kodekstiń jańa talaptary qaraldy, oǵan sáıkes táýekelderdi basqarýdyń avtomattandyrylǵan júıesi bolmaǵan jaǵdaıda memlekettik organdar baqylaýdaǵy sýbektilerdiń jalpy sanynyń 5% ǵana tekserýmen qamtı alady.

Bul norma 2023 jylǵy 1 qańtardan bastap qoldanylady.

Komıtet, tekserýlerdiń úılestirýshi retinde, jınalystyń qorytyndysy boıynsha osy baǵyttaǵy jumysty jandandyrý jóninde birqatar usynymdar berdi. Onyń ishinde qurylǵan sátten bastap 3 jyl ótpegen shaǵyn jáne mıkrokásipkerlik sýbektilerin qospaǵanda, baqylanatyn bıznes sýbektileriniń tizilimderin qurý qajettigi týraly aıtyldy.

Osy turǵyda keńeske qatysýshylar memlekettik baqylaýdy retteý jáne jetildirý jónindegi aldaǵy josparlar týraly pikir almasyp, jańa retteýshilik saıasat jaǵdaıynda baqylaý ókilettikterin júzege asyrý boıynsha is-sharalardy ázirledi. ​