Kásipkerlik salasy Qazaqstan jastaryn áli de qyzyqtyrmaı tur - Senat tóraǵasy
«Memleket basshysy bastama jasaǵan jańa aýqymdy jobalar jastar saıasatyndaǵy júıeli ózgeristerdi qamtıdy. Bul tusta bilim berýdiń sapasy men qoljetimdiligin arttyrý, turǵyn úımen qamtamasyz etý, jumysqa ornalastyrý, jastardyń arasyndaǵy kásipkerlikti yntalandyrý, densaýlyqtaryn nyǵaıtý, jas urpaq úshin tıimdi jumys isteıtin áleýmettik satylardy iske qosý týraly sóz bolyp otyr. Jastardy jumyspen qamtý máselesine aıryqsha nazar aýdarylatyn bolady. Áleýmettik zertteýlerdiń nátıjeleri boıynsha elimizdegi jastardyń 40 %-ǵa jýyǵy turaqty túrde jumysqa ornalasý problemalaryn bastarynan ótkizedi eken. Alaıda, qazirgi ýaqytta jastardyń arasyndaǵy jumyssyzdyq barlyq álemde ótkir máselege aınalyp otyr. Sońǵy derekter boıynsha jastardyń jumyssyzdyq deńgeıi 13%-dy quraıdy, al keıbir elderde 40%-ǵa jetedi. BUU derekteri boıynsha álemdegi árbir besinshi jas oqymaıdy jáne jumys istemeıdi», - dedi Senat tóraǵasy.
Osy oraıda Q. Toqaev jastardyń jumyssyzdyǵyn joıýdyń basty múmkindikterin shaǵyn jáne orta bıznes salasynan tabýǵa bolatynyn atap ótti.
«Bizdiń jastarymyzdyń boıynda kásipkerlik bastamalardy iske asyra bilý qabiletin tárbıeleý qajet. Qazaqstanmen salystyrǵanda ekonomıkalyq jaǵdaıy anaǵurlym qıyn jaǵdaıdaǵy kórshi memleketterdiń jastarynyń qanshalyqty ıkemdi, isker ekeni, óz shaǵyn bıznesterin júrgizýge beıimdelgeni baıqalyp otyr. Bul elderde jastar jańa mamandyqtardy ıgergen, óz týystary men óz memleketine qoldaý kórsetý maqsatynda ózdiginen jumys taýyp, shetelderde de jumys isteýde», - dedi ol.
Onyń sózinshe, ókinishke oraı, kásipkerlik salasy Qazaqstan jastaryn áli de qyzyqtyrmaı otyr.
«Áleýmettik saýaldardyń derekteri boıynsha suralǵan jastardyń 51 %-ynyń bıznespen aınalysý týraly oı josparynda joq eken. Bul problemaǵa basqa jaǵynan qaraǵan durys. Múmkin, biz bıznespen aınalysý úshin ózimiz tıisti jaǵdaı jasamaı otyrǵan shyǵarmyz?», - dedi Qasym-Jomart Toqaev.
