Kásipkerlik saladaǵy qajetsiz tekseristerdi azaıtýǵa bolady - A.Myrzahmetov

 - QazAqparat tilshisine suhbat bergen «Atameken» odaǵy» ulttyq ekonomıkalyq palatasynyń basqarma tóraǵasy Abylaı Myrzahmetov osylaı aıtty.

Onyń aıtýynsha, «Atameken» odaǵy damyǵan memleketterdiń, sondaı-aq TMD elderiniń tájirıbesin saralap shyqty. «Búgingi tańda Grýzııanyń tájirıbesi týraly jıi aıtady. Olarda órt sóndirý jáne sanıtarlyq-epıdemııalyq tekserý mekemeleri múldem joq. Onyń ornyna qoǵamǵa keltirilgen zalal úshin qylmystyq jaýapkershilik kúsheıtilip otyr. Saqtandyrý júıesi de jaqsy damyǵan. Eger qandaı da bir kásipker adam densaýlyǵyna zııan keltirse, onda ol saqtandyrý júıesi aıasynda qarastyrylǵan aqyny óz qaltasynan tóleıdi. Sondaı-aq Grýzııada tehnıkalyq standarttar qatań. Máselen, meıramhana ashatyn kez kelgen kásipker sol oryndy Amerıka men Eýropanyń standarttaryna saı etip, jabdyqtaýy mindet. Bul - óte utymdy tájirıbe. Árıne, biz birden órt sóndirý men sanıtarlyq ınspektsııany alyp tastaý kerek dep otyrǵan joqpyz. Biraq osy saladaǵy tekseris qujattaryn azaıtýǵa bolady. Ol jumysty sol qujattardy shyǵaratyn memlekettik organdarǵa naqty aýdıt júrgizý arqyly atqarǵan jón», - deıdi A.Myrzahmetov.

Ulttyq ekonomıkalyq palatanyń basshysy atap kórsetkendeı, buǵan deıin Úkimet aýdıt ótkizetin arnaıy komıssııany quryp, quramyna sol tekseris qujattaryn jasaıtyn memlekettik organdardyń múshelerin engizdi. Ol kezde «Atamekenniń» atynan 3-aq adam komıssııaǵa endi. «Qalǵan 20-25-si - baıaǵy sheneýnikter. Sonda qalaı? Olardyń óz-ózine aýdıt jasaıtyn bolǵany ma? Ondaı aýdıttyń qandaı bolatyny beseneden belgili. Sol sebepti bizdiń oıymyzsha, álgindeı komıssııany Ekonomıkalyq damý jáne saýda mınıstrligi basqarsa, al onyń quramyna úkimettik emes uıymdardyń sarapshylary kirýi tıis. Sonda ǵana ádil aýdıt ótkizip, naqty nátıjege qol jetkizýge bolady», - deıdi A.Myrzahmetov.