Kásipkerlik qyzmettiń rettelýin jetildirýdi kózdeıtin zań qabyldandy
ASTANA. QazAqparat - QR Parlamenti Senatynyń jalpy otyrysynda «QR keıbir zańnamalyq aktilerine kásipkerlik qyzmettiń rettelýin jetildirý máseleleri boıynsha ózgerister men tolyqtyrýlar engizý týraly» zańy qabyldandy, dep habarlaıdy QazAqparat.
Jalpy otyrysta zań jobasy týraly baıandama jasaǵan QR Ulttyq ekonomıka mınıstri Tımýr Súleımenovtiń aıtýynsha, qujatta 14 kodeks pen 109 zańǵa myńǵa jýyq túzetý engizý kózdelgen. Jobada memlekettik baqylaý-qadaǵalaý qyzmetin reformalaý, aqparattyq quraldardy retteý, tabıǵı monopolııalar sýbektileri jáne kvazımemlekettik sektor kórsetetin mindetti qyzmetterdi reformalaý, bıznes shyǵyndaryn túbegeıli tómendetý, básekelestikke kedergi keltiretin normalardy anyqtaý jáne alyp tastaý, baǵa men tarıftik sózbaılasýlardy anyqtaý jáne jolyn kesý tetigin jetildirý, Qazaqstannyń «Doing Business» reıtıngisinde pozıtsııalaryn jaqsartý baǵyttary qarastyrylǵan.
«Zań jobasyn qabyldaý Qazaqstandy josparly damytý jolyndaǵy mańyzdy qadam bolyp tabylady. Sebebi, bıznestiń ákimshilik jáne basqa shyǵyndaryn qysqartýǵa, barynsha aıqyn bıznes-ortany qamtamasyz etýge jáne kásipkerlik bastamany damytý úshin qolaıly jaǵdaılardy jasaýǵa múmkindik beredi», - dedi Tımýr Súleımenov.
Mınıstrdiń atap ótýinshe, keleshekte pysyqtaýdy talap etetin birqatar máseleler de qalyp otyr. Ol keıbir kásipkerlik retteý salalaryna qatysty.
«Bul máseleler, árıne, sizder bergen usynystardy eskere otyryp qaıta qaralady jáne jan-jaqty pysyqtalady. Birlesken júmystyń arqasynda bul zań jobasynyń qabyldanýy qolaıly bıznes-klımatty qurý jáne kásipkerlik bastamany damý úshin mańyzdy qadam bolyp, zor septigin tıgizedi dep úmittenemiz», - dedi ol.
Senat depýtattary zań jobasyn eki oqylymda talqylap, qabyldady.
