Kásipkerlik qyzmetti «taza paraqtan» retteý: Memorgandarǵa qandaı mindetter júkteldi

ASTANA. QazAqparat - Úkimettiń tsıfrlyq keńsesinde mindetti talaptar tizilimin engizý jáne memlekettik baqylaý júıesin avtomattandyrý máseleleri boıynsha keńes ótti.

Bul jumys kásipkerlik qyzmetti «taza paraqtan» retteý sheńberinde júrgizilýde, dep habarlaıdy QazAqparat QR Ulttyq ekonomıka mınıstrliginiń baspasóz qyzmetine silteme jasap.

Keńes barysynda «Smart Data Ukimet» aqparattyq-taldaý júıesinde iske asyrylǵan kásipkerlik salasyndaǵy mindetti talaptar tizilimin sapaly toltyrý máseleleri talqylandy.

Sondaı-aq, qatysýshylar baqylaý sýbektisin irikteý kezinde memlekettik baqylaýdy avtomattandyrý júıesin qalyptastyrý jónindegi tehnıkalyq máselelerdi qarady.

Kezdesý qorytyndysy boıynsha memlekettik organdarǵa tıisti tapsyrmalar berildi. Onyń ishinde tizilimdi sapaly toltyrý, baqylaý úshin sýbektilerdi irikteý jáne TBJ (táýekelderdi basqarý júıesi) kórsetkishterin jaqsartý jumystary bar. Bul baǵyttaǵy jumystardy múddeli memlekettik organdar bıznes-qoǵamdastyqpen tyǵyz qarym-qatynasta jalǵastyratyn bolady.

Tizilim - bul retteýshi aktilerdi turaqty negizde qaıta qaraýdy qamtamasyz etetin mindetti tetik.

2022 jyly bızneske qoıylatyn barlyq talaptardy tekserý boıynsha daıyndyq jumystary júrgizildi, onda jańa retteýshi saıasattyń bazalyq sharttaryna sáıkes kelmeıtin 10 myńǵa jýyq talaptar anyqtaldy.

2023 jyly zańnama kásipkerlik salasyndaǵy jańa tásilderge sáıkes keltiriletin bolady.

Іs-sharaǵa Ulttyq ekonomıka mınıstri Álibek Qýantyrov, Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın, sondaı-aq basqa da memlekettik organdardyń ókilderi qatysty.

Photo: t.me/presseconomy