Kásipkerlik qyzmetke memlekettiń negizsiz aralasýyn tyıý kerek - S. Áıimbetov
ASTANA. 16 qyrkúıek. QazAqparat - Kásipkerlik qyzmetke memlekettiń negizsiz aralasýyn tyıý kerek. Búgin Parlamenti Májilisinde ótken Úkimet saǵatynda ekonomıkalyq reforma jáne óńirlik damý komıtetiniń tóraǵasy, depýtat Seıitsultan Áıimbetov osylaı málim etti.
«Mysaly, Básekelestikti qorǵaý agenttiginiń aqparaty boıynsha kvazımemlekettik sektor sýbektileriniń qyzmetin odan ári júrgizýge arnalǵan 5 myńnan astam ótinishhatty qarastyrǵan kezde 447 kásiporynnyń odan ári qyzmet júrgizýden bas tartylǵan. Alaıda, osy ýaqytqa deıin 226 kásiporyn básekeles ortaǵa berilmegen. Bizdiń oıymyzsha, qazir júrgizilip jatqan ekonomıka salalaryn monopolııalyq sıpattan aryltý isi naryq sýbektilerin shyǵyndardy azaıtýǵa, básekelestik artyqshylyqtardy arttyryp, óndiristi jańǵyrtý úshin ınvestıtsııa salýǵa yntalandyrar edi», - deıdi S. Áıimbetov. Onyń aıtýynsha, osyǵan baılanysty kásipkerlik qyzmetke memlekettiń negizsiz aralasýyn qysqartý jóninde sharalar qabyldanýy tıis. Al óz kezeginde kásipkerler de óz taýarlaryn alǵa jyljytý jumysyn kúsheıtip, básekelestik kúreske aralasýy qajet.
