Kásipkerlik: BQO-da jyl sońyna deıin 7 mlrd astam teńgege 5 joba iske qosylmaqshy
ORAL. QazAqparat – Batys Qazaqstan oblysynda kásipkerlikti qoldaý kartasy aıasynda jyl sońyna deıin 7 mlrd astam teńgege 5 jobany júzege asyrý kózdelýde, dep habarlaıdy QazAqparat tilshisi.
Oblys ákimi Ǵalı Esqalıevtiń aıtýynsha, sonyń nátıjesinde 300-den astam jumys orny ashylmaqshy.
Atap aıtqanda, «Oral transformator zaýyty» JShS qýaty 35-500 kV transformatorǵa arnalǵan paneldi radıator óndirisin jolǵa qoımaqshy.
«Green Spark Limited» JShS kún batareıalaryn óndiretin bolsa, «Kvant» JShS jıhaz fabrıkasyn salýda.
«Intelligent Provective System» JShS derbes gaz analızatorlaryn shyǵarýdy josparlasa, «Kýbleı» JShS teri óńdeý tsehyn aspaqshy.
Jalpy, oblysta ınvestıtsııa tartý aıryqsha nazarda. Mysaly, bıylǵy segiz aıda negizgi qarjyǵa 291 mlrd teńge ınvestıtsııa qosyldy.
Óńir basshysynyń sózine qaraǵanda, eldegi indetke baılanysty shekteýlerge qaramastan, ınvestıtsııa tartý isi jalǵasýda. Bıyl ınvestorlar keńesinde 46 mlrd teńgeni qúraıtyn 18 joba (900-den astam jumys orny) maquldandy. Sonyń tórteýi boıynsha qurylys bastalyp ketti.
Maýsym aıynda «Bıznes úshin úkimet» jobasy iske qosylyp, sonyń aıasynda bıznesti qoldaý maqsatynda 50-den astam memlekettik qyzmet túri kórsetilýde.
Investorlar men memlekettik organdar aıasynda «bir tereze» qaǵıdaty boıynsha qyzmet tıimdiligin arttyrý maqsatynda invest07.gov.kz negizinde onlaın-platforma quryldy.
Bıyl osy kezge deıin «Oral qus fabrıkasy» JShS jylyna 18 mln dana taýarly jumyrtqa óndiretin jańa tsehty ashsa, «Oral jylyjaı kombınaty» JShS gollandııalyq tehnologııa boıynsha jylyna 3 myń tonna kókónis óndiretin 5 ga jerde jylyjaı keshenin (7 mlrd teńge) iske qosty.
