Kásipkerlik bilim berý mamany bıznestiń maqsaty týraly aıtyp berdi
NUR-SULTAN. QazAqparat - Almaty menedjment ýnıversıtetiniń prezıdenti Asylbek Qojahmetov el ekonomıkasyndaǵy kásipkerlik bilimniń róli týraly aıtyp berdi, dep habarlaıdy QazAqparat tilshisi.
«Qazaqstan-2050» strategııasynda el ekonomıkasynyń qozǵaýshy kúshi retinde shaǵyn jáne orta bıznesti (ShOB) damytý róli aıqyn kórsetilgen. Eger de 2009 jyldan bastap 2017 jyl aralyǵynda belsendi bıznes sýbektileri sany 73 paıyzǵa artsa, al 2030 jylǵa qaraı ekonomıkada ShOB úlesi aıtarlyqtaı ósýi tıis», - dedi A. Qojahmetov elordadaǵy «Innovatsııalyq ekonomıka úshin kásipkerlik bilim» atta ІІІ Halyqaralyq forýmynda.
Onyń sózine qaraǵanda, búginde shaǵyn jáne orta bıznes Nur-Sultan, Almaty jáne Shymkentte belsendi túrde artyp keledi.
«Kásipkerlik mádenıette oılaý, bastama, ıdeıa jáne jaýapkershilik basty rólde turady. Kásipkerlik qyzmetti damytý úshin mindetti túrde tabystylyq bolýy kerek ekeni túsinikti. Alaıda kásipkerlik qabileti bar kóshbasshy ekpindi tabystylyqtan buryn óziniń súıikti isimen aınalysýǵa jáne qoǵamǵa paıdasyn tıgizýge qoıady», - dedi ol.
Osy oraıda A. Qojahmetov XXI ǵasyrda joǵary bilimniń sapasy kásipkerlik bilimdi damytýmen tyǵyz baılanysty ekenin, ony iske asyrý jastar arasynda kásipkerlik oılaýdy yntalandyrý arqyly atqarylatynyn atap ótti.
Budan buryn habarlanǵandaı, elordada «Innovatsııalyq ekonomıka úshin kásipkerlik bilim» atty ІІІ Halyqaralyq forým óz jumysyn bastady.
Forýmnyń maqsaty - kásipkerlik bilim berý salasynda oqytý men tájirıbe almasý úshin ashyq saraptamalyq pikirtalasqa aýdıtorııany tartý. Onda mamandar osy sektordaǵy bilim berý baǵdarlamalarynyń úzdik tájirıbeleri men trendteri týraly áńgimeleıdi.
Shara barysynda belgili halyqaralyq jáne qazaqstandyq sarapshylardyń, kásipkerlik ári akademııalyq qaýymdastyqtardyń, memlekettik basqarý organdarynyń, sondaı-aq ÚEU ókilderiniń qatysýymen paneldik sessııalar ótip jatyr.
Osy oraıda forýmda «Innovatsııalyq ekonomıka úshin kásipkerlik bilim», «Memleket, bilim, bıznes jáne azamattyq qoǵam seriktestigi», «Ýnıversıtettiń damý strategııasy: fandraızıng, endaýment-qorlar jáne túlekterdi tartý», «Bilim berý mekemelerinde basqarý komandalaryn damytý» taqyryptary talqylanýda.
