Kásipkerlerge tómen paıyzben nesıe alatyndaı jaǵdaı jasaýmyz kerek - Máýlen Áshimbaev
Búgin Almatydaǵy «Atakent moll» saýda kesheninde kásipkerlermen júzdesken Máýlen Áshimbaev partııa tarapynan shaǵyn jáne orta bıznesti qoldaýǵa barynsha kómek jasalatynyn jetkizdi.
«Almaty qalasynda shaǵyn jáne orta bıznestiń róli zor. Ol úshin ákimdik tarapynan da úlken jumystar júrgizilip jatyr. Osy jumystarǵa partııamyz da úlesin qosyp, únemi qadaǵalaýynda ustap keledi. Degenmen, kásipkerlerdiń sheshilmegen máselesi jetkilikti. Búgingi kezdesýde kásipkerlerimiz nesıeniń qoljetimdiligin qamtamasyz etý máselesin kóterdi. Bankten kásipkerler nesıeni 20 paıyzben alatyny belgili. Muny retteý úshin memleket tarapynan shaǵyn jáne orta bızneste paıyzdarǵa demeýqarjy berý saıasaty júrgizilip jatyr. Sonyń arqasynda biraz kásipkerge nesıe tómengi paıyzben berilýde. Bul - memleket tarapynan jasalyp jatqan sýbsıdııa. Degenmen, máseleni túbegeıli sheshýdiń jolyn qarastyrýymyz kerek. Ony demeýqarjynyń arqasynda emes. Biz kásipkerlerimizge tómen paıyzben nesıe ala alatyndaı jaǵdaıdy ekonomıkamyzda qamtamasyz etýimiz kerek. Kezdesýde aıtylǵandardy sarapshy, ekonomıst mamandarmen birge talqylaımyz. Jalpy bıznestegi eń úlken másele - nesıeniń qoljetimdiligi», - dedi Máýlen Áshimbaev.
Ol shaǵyn jáne orta bıznesti qoldaý partııanyń negizgi basym baǵyttaǵy jumystarynyń biri ekenin atap aıtty.
«Elbasy 2050 jylǵa qaraı shaǵyn jáne orta bıznestiń ishki jalpy ónimdegi úlesin 50 paıyzǵa deıin jetkizýdi tapsyrdy. Elbasy saıasatynyń basty qoldaýshysy retinde «Nur Otan» partııasy da bul tapsyrmany júzege asyrýǵa belsene qatysýy kerek. Kásipkerlerdi qoldap, olardyń múddesin qorǵaý - partııamyzdyń basty mindetteriniń biri».
Máýlen Áshimbaev partııa aldynda turǵan áleýmettik saladaǵy máselelerdi saraptaý úshin saıası uıym janyndaǵy saraptama ınstıtýtynyń jumysyn kúsheıtetinin aıtty.
