Kásipkerlerge satyp alýlarǵa qatysý úshin teń múmkindikter beriledi - Máýlen Áshimbaev
Aıta keteıik, búgin palata depýtattary «Kvazımemlekettik sektordyń jekelegen sýbektileriniń satyp alýy týraly» Zańy men ilespe qujatty qabyldady.
«Memlekettik qarjyny tıimdi jumsaý – asa mańyzdy másele. Memlekettik satyp alýdy, onyń ishinde kvazımemlekettik sektordyń alýyn tıimdi paıdalanýdy pandemııadan keıingi kezeńde ekonomıkalyq básekelestikti qalpyna keltirýdiń tetigi retinde qarastyrǵan jón. Alaıda osyǵan deıin ulttyq kompanııalar men memlekettik holdıngterdiń satyp alýlary jalpy tártipten shyǵarylyp, óz erejeleri boıynsha júrgizilip keldi. Memleket basshysy bul máselelerdi sheshý úshin tıisti zańdy qabyldaýdy tapsyrǵan edi. Sonyń nátıjesinde zańdar ázirlenip, qabyldanyp otyr»,- dep toqtaldy Senat tóraǵasy palatanyń jalpy otyrysynda.
Onyń paıymynsha, bul normalar kvazımemlekettik sektordyń jekelekegen sýbektileriniń satyp alýdaǵy biryńǵaı júıesin qalyptastyrady.
«Zańdardy júzege asyrý satyp alý rásimderiniń tıimdiligi men ashyqtyǵyn arttyrýǵa jol ashady. Bul óz kezeginde sybaılas jemqorlyq táýekelderin azaıtady. Búgin qabyldanǵan zańdar aldaǵy ýaqytta elimizde qarajatty tıimdi paıdalanýǵa, sondaı-aq kásipkerlerge satyp alýlarǵa qatysý úshin teń múmkindikter berýge yqpal etedi dep senemiz», - dedi M. Áshimbaev.