Kásipkerlerge qyzmet kórsetý ortalyqtary tsıfrlyq formatqa kóshedi

ASTANA. QazAqparat - Qazaqstanda Kásipkerlerge qyzmet kórsetý ortalyqtaryn (KQKO) tsıfrlyq formatqa kóshirý jumystaryn kelesi jyly aıaqtaý josparlanýda. Bul týraly Úkimet otyrysynda shaǵyn jáne orta bıznestiń damýy týraly sóz sóılegen «Atameken» QR Ulttyq kásipkerler palatasynyń basqarma tóraǵasy Abylaı Myrzahmetov málim etti, dep habarlaıdy «QazAqparat» HAA tilshisi.

Ulttyq kásipkerler palatasy basqarma tóraǵasynyń aıtýynsha, elimizdegi bıznes-mektepterdiń jumysy aıtarlyqtaı oń nátıje kórsetip otyr. Naqtyraq aıtqanda, ótken jyly bıznes-mektepter arqyly 22 myńǵa jýyq qatysýshyǵa qyzmet kórsetildi. Onyń 2700-i ózderiniń kásibin ashyp, taǵy 2 myńǵa jýyq qatysýshy bıznesin keńeıtýge múmkindik alǵan.

«Ulttyq ekonomıka mınıstrligine bıznestiń qaı salasy suranysty talap etip turǵanyn aıtyp kelemiz. Óz tarapynan mınıstrlik jyl saıyn túzetýler engizedi. Ásirese, esepshilik qyzmet, salyq jáne zańgerlik qyzmetteri turǵysynan usynystar kóp joldanady», - deıdi ol.

Abylaı Myrzahmetov ótken jyldan bastap memlekettik-jekemenshik seriktestik týraly, al qazir ІT salasynda birshama usynystar berilip jatqanyn tilge tıek etti.

«Tsıfrlandyrý baǵdarlamasy aıasynda 1 sáýirge deıin KQKO-nyń jumys formatyn ózgertý boıynsha usynys engizgeli jatyrmyz. Barynsha onlaın-baılanys ornatý baǵytyn jolǵa qoıý mańyzdy dep bilemiz. Ótken jyly bul tájirıbe synaqtan ótkizilgen. Sondyqtan, bul baǵyttaǵy jumystyń barlyǵyn aıaqtap, kelesi jyly KQKO-dy tsıfrlyq formatqa kóshiremiz degen oıdamyn», - deıdi ol.