Kásipkerlerge kedergi keltirgenderge jaýapkershilikti kúsheıtý qajet - «Atameken» UKP
ASTANA. QazAqparat - Kásipkerlerik qyzmetke kedergi keltiretin memlekettik qyzmetshilerge jaýapkershilikti kúsheıtý qajet. Mundaı pikirdi búgin «Atameken» QR UKP tóralqasynyń tóraǵasy Tımýr Qulybaev bildirdi, dep habarlaıdy QazAqparat.
«Biz keri baılanys quraly Memlekettik qyzmet isteri agenttigimen birlesip jumys isteýdemiz. Máselen, salyqshylar kásipkerge asyra salyqtyq talap eseptedi deıik. Al odan keıin sot arqyly uzaqqa sozylatyn mán-jaıdy anyqtaý protsesi júredi. Bul adamdardyń ýaqytyn alyp, qarajatyn shyǵyndaıdy», - dedi Tımýr Qulybaev elimizdiń Bas prokýratýrasynda ótken «Kásipkerlik salasyndaǵy prokýratýra qadaǵalaýy» atty bıznesti qorǵaý jónindegi ekinshi forýmda.
Osy rette ol aldaǵy ýaqytta zańǵa engiziletin ózgeristerde memlekettik qyzmetshiniń jaýapkershiligin arttyrý máselesin qarastyrý qajettigin basa aıtty.
«Jańa ózgerister barysynda memlekettik qyzmetshiniń jaýapkershiliginiń artqanyn qalaımyz. Biz statıstıkany qaradyq. Búginde «Memlekettik qyzmet týraly» Zańda olardyń istegen áreketi úshin jaýap berýi tıistigi týraly norma bar. Biraq, ókinishke oraı is júzinde kásipkerlik qyzmetke kedergi keltirilgendigi dáleldengenderdiń ózi ary ketkende ákimshilik jáne tártiptik jazaǵa tartylady. Biz bul adamdardy barynsha jazalaýymyz qajet», - dedi ol.
Onyń paıymynsha, kásipker óziniń jan-jaqty qorǵalǵanyn seziný úshin zańnamada memleketik qyzmetshige barynsha qatań sharalar kózdelýi tıis.
«Bul baǵytta jumys istep te jatyrmyz. Menińshe, bul Bas prokýratýramen birlesken jumysymyzda basymdyq berip otyrǵan máselelerdiń biri. Memlekettik qyzmetshiniń jaýapkershiligi kóterilýi tıis, shyn bolýy qajet. Bul máselede Memlekettik qyzmet ister agenttigimen belsendi yntymaqtasýdamyz. Jaqsy nátıjeleler de bar», - dedi Tımýr Qulybaev.
