Kásipkerlerge qatysty myńdaǵan sanıtarlyq talap qysqartyldy - «Atameken» palatasy
Onda 11 543 talap bar. Revızııanyń nátıjesinde, tekseris qaǵazdarynan ol talaptardyń 80 paıyzyn, ıaǵnı 9 172-sin alyp tastaý týraly sheshim shyǵaryldy. Osylaısha, tekseris qaǵazdarynda 2 371 talap qaldy, dep xabarlaıdy QazAqparat tilshisi.
"Máselen, tamaq ónimderiniń kóterme jáne bólshek saýdasymen aınalysatyn oryndarǵa qatysty 207 sanıtarlyq talap bolǵan. Sonyń 158-in, ıaǵnı 76 paıyzyn alyp tastaýǵa usynys berildi. Atap aıtqanda, balyq jáne balyq ónimderin saqtaý úshin bólek muzdatqyshty ornatý sııaqty talaptardy alyp tastap otyrmyz. Sosyn óndiristik bólmeler men ydys-aıaqtardyń dezınfektsııasyn baqylaýǵa ishki tekseristiń ózi jetip jatyr. Al syrttan kelgen tekserýshi ydystardan qaýipti bir mıkroflorany anyqtasa, tıisti sharany qoldana alady. Budan bólek, janýarlardan alynatyn shıkizattan jasalǵan ónimderdi veterınarlyq kýáliksiz satýǵa bolmaıdy degen talapty alyp tastady. Sebebi daıyn ónimge ondaı qujat qajet emes", - dedi Óstemirov.
Onyń aıtýynsha, búginde jańa tekseris qaǵazdaryn bekitý týraly Ulttyq ekonomıka mınıstriniń buıryǵy "Atameken" palatasynyń qaraýyna tústi. Jaqyn arada palata óz ustanymyn bildiredi. "Osylaısha, biz sanıtarlyq-epıdemıologııalyq qaýipsizdik boıynsha tekseris qaǵazdaryn tazartyp shyqtyq. Degenmen, sanıtarlyq erejelerde jalpy talaptar saqtaldy. Onyń ishinde de problemalar jetip artylady", - dep atap kórsetti Óstemirov kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń búgingi otyrysynda.
Aıta keteıik, otyrys barysynda Bas prokýratýra aqylǵa syımaıtyn keıbir tekseristerdi jarııalady.
Prokýratýranyń departament basshysy Marat Seksembaevtyń aıtýynsha, jergilikti jerde kásipkerlerdi tekseretin organdar oıyna kelgendi istep,oryndaýǵa múldem kelmeıtin talaptardy qoıyp júr.