Kásipkerlerge ındýstrıaldy sertıfıkattar ne úshin beriledi
QARAǴANDY. QazAqparat - Qaraǵandylyq ónim óndirýshiler úshin ındýstrıaldy sertıfıkattardy qalaı jáne ne úshin alý kerektigi túsindirildi, dep habarlaıdy QaAqparat tilshisi.
Óńirlik kásipkerler palatasynyń habarlaýynsha, búginde ındýstrııalyq sertıfıkattar rásimdeýge 6 kásiporyn ótinim berdi. Negizinen ol jeńil ónerkásip kásiporyndary.
Indýstrıaldy sertıfıkatty qalaı alýǵa bolady jáne bul qujat qandaı artyqshylyqtar beretin jaıly Kásipkerler palatasynda aıtyp berdi.
«1 shildeden bastap ındýstrııaldy sertıfıkat memlekettik satyp alýǵa qatysý úshin mindetti bolady. QR Qarjy mınıstrligi memlekettik satyp alýdy júzege asyrý erejesine tıisti ózgeristerdi engizdi. Eń aldymen bul jıhaz jáne jeńil ónerkásip kásiporyndaryna qatysty. Ózgeristerge sáıkes, «qarapaıym zattar ekonomıkasy» taýarlaryn satyp alýǵa tek bilikti jetkizýshiler tizilimine engizilgen óndirýshiler ǵana qatysa alady. A ol tizimge tek ındýstrıaldy sertıfıkat arqyly ǵana iligýge bolady. 1 shilde jaqyndap qaldy, sondyqtan asyǵýǵa týra keledi. Biz qazir kásipkerlermen kezdesip, barlyǵyn túsindirýdemiz. Jáne qajetti kómektiń barlyǵyn kórsetemiz, - dep túsindirdi Qaraǵandy oblysy Kásipkerler palatasynyń dırektory Ernar Kúlpeısov.
Indýstrııaldy sertıfıkattardy QR «Atameken» UKP beredi. Ótinim jáne barlyq qajetti qujattar elektrondyq túrde tapsyrylýy tıis.
Birinshi qadam - saıtta ETsQ kómegimen doc24.kz saıtyna tirkelý qajet. Budan ári jeke kabınetke ótinish pen elektrondyq qujattar paketin jiberý kerek.
Ótinim óńirlik kásipkerler palatasyna óńdeýge túsedi.
Taǵy bir qoıylatyn mindeti talap - salalyq sarapshymen kelisimshartqa otyrý, ol qorytyndy berý úshin kelip, taldaý ótkizýi tıis.
Sarapshy qorytyndysynan keıin kásiporynǵa óndiristi jáne qujattamany tekserý úshin óńirlik kásipkerler palatasy men jergilikti atqarýshy organdardyń ókilderi keledi. Komıssııa negizinen salyq eseptiligin jáne qaýipsizdik tehnıkasynyń saqtalýyn tekseredi.
Indýstrııaldy sertıfıkat elektrondy túrde tegin beriledi. Osydan keıin kásiporyn avtomatty túrde otandyq taýar, jumys jáne qyzmet óndirýshilerdiń tizilimine engiziledi.
Memlekettik satyp alýǵa qatysýǵa ruqsattan basqa Indýstrııaldy sertıfıkat kásipkerlerge basqa da artyqshylyqtar beredi. Ol: «Samuryq-Qazyna» holdınginiń taýar óndirýshiler tizilimine engizý; «Samuryq-Qazyna» qorynyń aldyn ala biliktilik irikteýinde jınaǵan baldarǵa 20% qosý; otandyq taýarlardy, jumystardy jáne qyzmetterdi syrtqy naryqta jyljytý boıynsha shyǵyndardy óteý.
