Kásipkerlerge «bir tereze» qaǵıdasymen qyzmet etetin alǵashqy ortalyq ashyldy - ShQO
ASTANA. QazAqparat - Shyǵys Qazaqstan bıznesmenderi budan bylaı «bir tereze» arqyly quzyrly organ ókilderinen eń qajetti qyzmet túrlerin tikeleı ala alady.
Aımaq basshysy tolyq formattaǵy kásipkerlerge qyzmet kórsetý ortalyǵynyń jumysymen jeke ózi tanysty, dep habarlaıdy ShQO ákiminiń baspasóz qyzmeti.
Óńir basshysy Danıal Axmetovtiń tapsyrmasy boıynsha kásipkerler palatasy men «Damý» qory negizinde qurylǵan ortalyqta 8 túrli servıstik qyzmet kórsetiledi. Eń bastysy munda barlyq salalyq jáne memlekettik organdardyń ókilderi bar. Olar endi máseleni jyldam sheship qana qoımaı, ruqsat jáne texnıkalyq qujattardy berý isimen de aınalysady. Sondaı-aq, «Bıznes mektebi» men «Kezekshi prokýror» da jumys isteıdi.
- Bızneske qajettiniń bárin bir jerge shoǵyrlandyrdyq. Munda jer qatynastary komıtetiniń ókilderi, sý, jylý, káriz júıesi, elektr energııasy sııaqty ınfraqurylym qyzmeti ókilderi de jumys isteıdi. Keden departamenti de bar. Bir kúnnen keıin salyq, ádilet basqarmalary men memlekettik-jekemenshik seriktestik ortalyǵynyń mamandary da bolady. Ary-beri júrmeı, osy jerden máselesin sheship, suraqtaryna jaýap alýǵa barlyq jaǵdaı jasaldy, - dedi oblys ákimi.
Kezdesý barysynda aımaqtyń kommýnıkatsııalary men jer ýchaskeleriniń ınteraktıvti kartasy kórsetildi. Dál osyndaı ortalyq Semeıde de ashylady. ShQO kásipkerler palatasy dırektory Igor Shatskııdiń aıtýynsha, oǵan qajetti resýrstar men ǵımarat daıyn.
