Kásipkerlerge beriletin kredıt mólsherlemesi tómendedi
ASTANA. QazAqparat - Kásiporyndar teńgemen berilgen kredıtter mólsherlemesi tómendedi. Bul týraly búgin Úkimet otyrysynda Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.
E.Dosaev kredıt berý naryǵynyń qalpyna kelip jatqandyǵyn aıtty.
«2019 jylǵy qańtarda 898 mlrd teńge somaǵa jańa kredıtter berildi. Bul ótken jylǵy osyndaı kezeńnen 8,2 paıyzǵa kóp. Kredıttik portfel 2019 jylǵy qańtardyń sońynda 12,5 trln teńgeni qurady», - dedi ol.
UB basshysy kásiporyndarǵa teńgemen kredıtter boıynsha mólsherleme 2018 jyldyń basyndaǵy 13,2 paıyzdan 2019 jylǵy qańtarda 12,4 paıyzǵa deıin tómendegenin, qysqa merzimdi kredıtter boıynsha mólsherleme 12,9 paıyzdan 12,3 paıyzǵa deıin, uzaq merzimdi kredıtter boıynsha 14,3 paıyzdan 13,8 paıyzǵa deıin túsirilgenin atap ótti.
«Ekonomıkanyń basym sektorlary úshin 600 mlrd teńge somaǵa uzaq merzimdi resýrstar berý mindeti aıasynda Qazaqstan Ulttyq banki Úkimetpen jáne banktermen birlesip jobalardy qarjylandyrý tetikterin ázirledi. Qazirgi ýaqytta olar iske asyrylýda. 2019 jylǵy 1 naýryzda eki banktiń 25 mlrd teńge somaǵa oblıgatsııalary satyp alyndy», - dedi E.Dosaev.
