Kásipkerlerge aýyl sharýashylyǵy tehnıkasyn lızıngke berý úshin 14,4 mlrd teńge bólinbek

ASTANA. QazAqparat – Avtokólik quraldary men arnaıy maqsattaǵy avtotehnıkany satyp alatyn zańdy tulǵalar men dara kásipkerlerdi lızıngilik qarjylandyrý úshin respýblıkalyq bıýdjetten 14,4 mlrd teńge bólinbek. Bul týraly Indýstrııa jáne ınfraqurylymdyq damý mınıstrligi ashyq talqyǵa shyǵarǵan Úkimet qaýlysynda kórsetilgen, dep habarlaıdy QazAqparat tilshisi.

«Qazaqstanda óndirilgen aýyl sharýashylyǵy tehnıkasyn qospaǵanda, avtokólik quraldary men arnaıy maqsattaǵy avtotehnıkany lızıngige satyp alatyn zańdy tulǵalar men dara kásipkerlerdi lızıngtik qarjylandyrý úshin «Ónerkásipti damytý qory» aktsıonerlik qoǵamyna keıinnen kredıt bere otyryp, «Báıterek» ulttyq basqarýshy holdıngi» AQ bıýdjettik kredıt berýdiń negizgi sharttary bekitilsin», - delingen Úkimet qaýlysynda.

Qujattyń túsindirmesinde jazylǵandaı, bul jobany iske asyrý úshin 2023-2025 jyldarǵa arnalǵan respýblıkalyq bıýdjetten 14 mlrd 400 mln teńge qarajat bólinedi.

«Bıýdjettik kredıt berý lızıng quraly arqyly qarjylandyrý jańa jumys oryndaryn qurýǵa, eńbek ónimdiligin arttyrýǵa, salyq tólemderin ulǵaıtýǵa baǵyttalatyn bolady», - dep túsindirme berilgen qaýlyǵa.

Joba júzege asqan kezeńde «Báıterek» AQ toqsan saıyn QR Qarjy mınıstrligi men Indýstrııa jáne ınfraqurylymdyq damý mınıstrligine kredıttiń ıgerilýi týraly aqparat berip turýǵa mindetteledi.

Qaýlyny ashyq talqylaý 31 qańtarǵa deıin jalǵasady.