Kásipkerlerge 4-6 paıyzben nesıe berilýde- Aýyl sharýashylyǵyn qoldaý qory

NUR-CULTAN. QazAqparat - «QazAgro» ulttyq basqarýshy holdınginiń enshiles kompanııasy – Aýyl sharýashylyǵyn qarjylaı qoldaý qory 2017-jyldan beri «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasynyń ekinshi baǵytyn iske asyryp keledi. Bıyldyń ózinde myńnan astam kásipker nesıe alyp úlgerdi. Bul týraly QazAqparat AShM silteme jasap habarlaıdy.

SQO Qyzyljar aýdanynyń Beskól aýylynda turatyn tigin tsehi bar jeke kásipker Baqyt Seıilova kıim qysqartýdan bastap mektep formasyna deıin tigedi. 2010 jyldan beri «Jumyspen qamtýdyń jol kartasy - 2020» jáne «Eńbek» memlekettik baǵdarlamalar arqyly Qordan tórt ret nesıe alyp, bıznesin keńeıtken. Qazirgi ýaqytta 6 adamǵa jumys berip otyr.

«Qazir eńbek etemin degen adamǵa memleket qoldaý kórsetedi. Ony tek tıimdi paıdalaný kerek. Men osy kásippen aınalysqaly Aýyl sharýashylyǵyn qarjylaı qoldaý qorynan tórt ret nesıe aldym. Sonyń arqasynda tigin tsehimdi keńeıttim, aınalym kapıtalymdy tolyqtyrdym. Jumysym oıdaǵydaı júrip jatyr», - deıdi kásipker Baqyt Seıilova.

Osy aýylda turatyn jeke kásipker Keńes Kýkıev jylqy sharýashylyǵymen aınalysady. Ol da 2014 jáne 2019 jyldary «Jumyspen qamtýdyń jol kartasy - 2020» jáne «Eńbek» memlekettik baǵdarlamasy aıasynda Aýyl sharýashylyǵyn qarjylaı qoldaý qorynyń SQO fılıalynan eki ret nesıe alyp, sharýashylyǵyn odan ári damytqan. Búgingi tańda otyz bıe saýyp otyrǵan kásipker qymyz daıyndap satady. Sharýashylyqta 3 adam turaqty jumyspen qamtylǵan.

«Aýylda turǵan soń maldyń ıgiligin kórý kerek dep esepteımin. Ońaı olja joq. Bári eńbekpen keledi. Jylqy baǵýdyń da ózindik qıyndyqtary bar. Uqsata bilseń, soǵan oraı tabysyn da kórýge bolady. Aýyl sharýashylyǵyn qarjylaı qoldaý qorynan eki ret nesıe alyp, jylqy basyn kóbeıttim, saýyn bıelerimniń sanyn arttyrdym. Qymyz ashytyp satamyz. Tabysymyz jaqsy. Úsh adamǵa jumys berip otyrmyn», - deıdi Keńes Kýkıev.

Soltústik Qazaqstan oblysy mal sharýashylyǵyna qolaıly aımaq. Jeri keń, shóbi shúıgin, sýy móldir. Sondyqtan bolar, Qordan nesıe alýshylardyń basym kópshiligi mal sharýashylyǵymen aınalysady. Sonyń ishinde jylqy ósirýdi qolǵa alǵan sharýalar kóp.

«Bıyl bizdiń fılıalǵa «Eńbek» baǵdarlamasy boıynsha 2,28 mlrd teńge qarjy bólingen bolatyn. Búgingi tańda onyń 1 mlrd teńgeden astamy ıgerilip, 286 joba qarjylandyryldy. Jalpy, bıyl jyl sońyna deıin 529 kásipkerge nesıe berýdi josparlap otyrmyz», - deıdi «Aýyl sharýashylyǵyn qarjylaı qoldaý qory» AQ SQO fılıalynyń dırektory Abylaı Nurkenov.

Qor óziniń nesıe ónimderi arqyly aýyl turǵyndary men aýyl sharýashylyǵy taýaryn óndirýshilerdiń jobalaryn túrli maqsatty baǵyttar boıynsha qarjylandyrady. Naqty aıtar bolsaq, mal sharýashylyǵyn, ósimdik sharýashylyǵyn, aýyl kásipkerligin damytý jáne aýyl sharýashylyǵy ónimderin qaıta óńdeý men saqtaý jobalary bar.

4-6-12 mln teńgege deıingi nesıe 6,5 jylǵa 6 protsentpen beriledi. Jyldyq tıimdi syıaqy mólsheri 6,7 protsentten aspaıdy. Aıta ketý kerek, az qamtylǵan jáne kópbalaly otbasy múshelerine 4 protsentpen beriletin nesıeniń jyldyq tıimdi syıaqy mólsheri 4,7 protsentten aspaıdy. Bir jylǵa deıingi jeńildik merzimi de qarastyrylǵan.