Kásipkerlerge 2 myńǵa tarta zańsyz tekserý júrgizgeni úshin 200 adam jaýapqa tartyldy - Bas prokýratýra

ASTANA. 22 qazan. QazAqparat - Aǵymdaǵy jyly kásipkerlerge qatysty 2 myńǵa tarta zańsyz tekserý faktisi anyqtalyp, ol boıynsha 200 adam jaýapqa tartyldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Bas prokýrorynyń orynbasary Jaqyp Asanov málim etti.

Toqtala ketetin jaıt, ótken jolǵy Úkimettiń keńeıtilgen otyrysynda Memleket basshysy N. Nazarbaev kásipkerlerdi zańsyz tekserý kóbeıip ketkenin jáne ol úshin jaýapqa tartylǵan adamdardyń azdyǵyn aıtqan bolatyn. Prokýratýra osy syndy oryndy sanaıdy. «Rasynda da, tekserýshi organdar tarapynan bıylǵy jyly josparlanǵan 100 myńnan astam tekserýlerdiń 2 myńyn biz zańsyz dep tanydyq, olardy jospardan alyp tastadyq. Atalǵan 2 myń fakti boıynsha 200 adam jaýapqa tartyldy. Onyń 185-i - tártiptik, 19-y ákimshilik jaýapqa tartyldy. Jalpy tekserýlerdiń 90 paıyzy - sanıtarlyq-epıdemıologııalyq, tótenshe jaǵdaı, veterınarııa jáne ekologııa salalarynyń qyzmetkerleri», - dedi Jaqyp Asanov.

Budan bólek, J. Asanovtyń aıtýynsha, osyndaı faktilerge qaramastan prokýratýra usynymdaryna atústi qaraıtyndar da barshylyq. «Sondyqtan, árbir jergilikti prokýrorǵa osy aıdyń aıaǵyna deıin óziniń engizgen usynysy boıynsha jazalanbaǵan kináli tulǵalardy jaýapkershilikke tartý boıynsha qosymsha sharalar qabyldaý tapsyryldy», - dedi prokýror orynbasary.