Kásipkerlerdiń shaǵymdary qanaǵattandyryldy - Qyzylorda oblysy
QYZYLORDA. QazAqparat - Kásipkerler palatasy janyndaǵy kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńesiniń kezekti otyrysy ótti, dep habarlaıdy QazAqparat tilshisi.
Keńestiń kóshpeli otyrysyn Shıelide ótkizýge aýdandaǵy kásipkerlerden túsken shaǵym sebep boldy. Atap aıtqanda, Shıeli aýdany boıynsha kirister basqarmasynyń jyldyń qarjylyq aınalym kólemin 2,1 mln teńgeden negizsiz arttyrý jóninde talabyna baılanysty kásipkerlik sýbektileriniń aryzdary qaraldy.
Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi Keńesiniń tóraǵasy Erlan Qojanov bul máselege qatysty: «Kásipkerlerdiń shaǵymynda kórsetilgen derekter dálelin taýyp, shyn máninde aýdandyq kirister bólimi qyzmetkerleriniń salyq bazasyn ulǵaıtýda bazardaǵy shaǵyn kásipkerlik sýbektilerine qarjylyq aınalymdaryn kóbeıtip, qaıtadan deklaratsııa tapsyrý týraly talaptary bolǵany anyqtaldy. Keńes sheshimimen oblystyq kirister departamentine jáne Shıeli aýdandyq prokýratýrasyna hat joldanyp, kásipkerlerdiń ótinishteri qanaǵattandyryldy», - dedi.
Keńeste qaralǵan kelesi másele Shıeli aýdandyq jer qatynastary bóliminiń áreketsizdigine jáne jer qatynastary salasyndaǵy ákimshilik kedergiler týraly osy aýdannyń turǵyny Ǵafýr Baıdeýdiń ótinishi.
Bul máselede de kásipkerge mal jaıylymyna tıisti jer berilmeı, onyń 2 jyl kóleminde áýre-sarsańǵa túskeni anyqtaldy. Osyǵan baılanysty, Keńeske qatysqan aýdan ákimi aýdandyq jer qatynastary tarapynan bolǵan kedergilerdi rastap, Ǵafýr Baıdeýge suraǵan jer telimin alýǵa tıisti kómegin jasady.
Búgingi kúnde atalǵan kásipker jaıylymdyqqa 600 gektar jer alyp, sharýasy alǵa basýda. Sonymen qatar, 200 gektar jer alý úshin aýktsıonǵa túsip taǵy da talaptanyp jatyr.
Aıta ketý kerek, 2018 jyly keńestiń 6 otyrysy ótkizilip,12 másele qaraldy. Búgingi kúnge olardyń 8-i oń sheshimin tapty.
