Kásipkerlerdiń salyqtyq daýlary sotqa jetpeı sheshilip jatyr
Onyń atap ótýinshe, búginde kásipkerlerdiń problemaly máselelerin sheshýge elimizdiń árbir óńirinde qurylǵan Bıznestiń quqyǵyn qorǵaý jónindegi keńester kómektesedi. Sonymen qatar Qarjy mınıstrliginiń janyndaǵy apellıatsııalyq komıssııa da olardyń salyqtyq daýlaryn sotqa jetkizbeı sheshýge septigin tıgizip otyr. Osy oraıda tóralqa tóraǵasynyń aıtýynsha, bıznestiń negizgi problemalaryn, onyń ishinde jemqorlyq kórinisi máselelerin túsinýge óńirlerdegi skrınıngter kómektesedi.
«Biz qazirdiń ózinde ilki rejımde Túrkistan, Aqtóbe jáne Atyraý oblystarynda skrınıng júrgizdik. Jyldyń sońynda barlyq óńirde skrınıng júrgiziletin bolady. Osylaısha, aýyldardaǵy ınfraqurylymdardy odan ary damytý úshin árbir eldi mekendegi halyq pen kásipkerliktiń problemaly máseleleriniń ózekti tizimi aıqyndalady»,- dedi Tımýr Qulybaev búgin Kásipkerlerdiń sybaılas jemqorlyqqa qarsy is-qımyly jónindegi ІІІ respýblıkalyq forýmda.
Tóralqa tóraǵasynyń dereginshe, sońǵy jyldary bıznes úshin ruqsat sany 70 paıyzǵa qysqaryp, talap sany 60 paıyzǵa kemigen. Baqylaýshy organdardyń qysymy 20 paıyzǵa tómendep, tekserý merzimi 2 esege qysqardy. Qylmystyq zańnamany izgilendirý oń áserin berip otyr. Nátıjesinde ekonomıka salasyndaǵy qylmystyq isterdiń tirkelýi 5 esege azaıdy.
Sondaı-aq, ol bos jer ýchaskeleri týraly aqparattardyń ashyq emestigi jemqorlyqtyń taǵy bir kózi ekendigin aıtty.
«Qorytyndysynda jer paıdalanylmaıdy, ekonomıkalyq protsester damymaıdy, memleket bıýdjetke tólemder men salyqtar tolyq ala almaıdy. Ákimdikterdiń málimetteri boıynsha 2018 jyly saýda arqyly shamamen 1,1 myń ýchaske satyldy. Bul jalpy sannyń ne bári 6 paıyzy ǵana. Aǵymdaǵy jyly ákimdikterden jerdiń qoljetimdiligi týraly aqparattardy tsıfrlandyrý jumystaryn aıaqtaýdy suraımyz», - dedi ol.