Kásipkerlerdiń quqyǵy áli tolyqqandy qorǵalmaı tur - prokýror
Kásipkerlerdi meılinshe qorǵaýǵa kirisken shtab búgin qaıtsek kedergini joıyp, bıznestiń damýyna jol ashamyz degen taqyrypty talqyǵa saldy. Oblystyń bas prokýrory Nurǵalym Ábdirovtiń aıtýynsha, zań ońtaılandyrylǵanymen, kásipkerlerdiń quqyǵy únemi qorǵala bermeıdi. Máselen, ótken jyly Hromtaý aýdanynyń kásipkerleri jer ala almaı, túrli shaǵym túsirip, kómek kútkenimen, eshkim kóńil bólmegen. Kásipkerlerdiń quqyqtaryn qorǵaý shtaby bul isti qolǵa alyp, kásipkerlerge jer alýǵa septik etti. Jıyn kezinde bıznes ıeleriniń mazasyn alyp, tynyshyn qashyratyn memlekettik organdardyń aty ataldy. Ádettegideı kóshti tutynýshylardyń quqyqtaryn qorǵaý departamenti bastap tur.
«Kásipkerlerdiń quqyǵyn qorǵaý jumysy áli kúnge deıin oń nátıje bermeı otyr. Statıstıkaǵa súıensek, 2015 jyly 3 myńnan astam kásipkerlik qyzmeti tekserilse, ótken jyly tekserý sany 2 esege artqan. 6 myńnan astam tekserý júrgizilse, onyń tek jartysynan astamy esh nátıje bermegen. Bul tekserýshi organ men kásipker ýaqyty men qarjysynyń shyǵynyn kórsetedi. Kóbine tutynýshylardyń quqyqtaryn qorǵaý, memlekettik kirister jáne tótenshe jaǵdaılar departamentteri kiredi. Olar 4 myńnan astam tekserý júrgizgen eken. Tekserýdiń 56 paıyzy esh negizsiz júrgizilgen»,- dedi oblystyq prokýratýranyń І-basqarma basshysy Qanat Nahymbekov.
Quqyqtyq statıstıka komıtetiniń oblystyq basqarmasy men oblys prokýratýrasy ótken jyly 81 tekserýdi negizsiz dep taýyp, toqtatqan. Memlekettik qyzmetkerdiń 30-dan astamy jazalandy. Otyrys kezinde kásipkerlerdi qýdalap, qylmystyq jaýapkershilikke tartýdyń azaıǵany aıtyldy. Máselen, ótken jyly qylmystyq is 5 esege azaıyp, 43-ti quraǵan.
«Kásipkerlerdiń shaǵymy azaıǵan joq. Olar kóbine sáýlet jáne qala qurylysy, jer qatynastary bólimi men memlekettik kirister departamentine shaǵym aıtady. Sońǵy jyly kásipkerlerdi qylmystyq jaýapkershilikke tartý sany azaıdy. Degenmen, jalǵan kásipkerligi úshin jaýap berip, qylmystyq jazaǵa tartylǵan bıznes ıelerimen birlese jumys istegen ózge kásipkerlerdiń máselesi áli kúnge deıin sheshimin tappaı otyr»,- dedi oblystyq kásipkerler palatasy dırektorynyń orynbasary Mırlan Bısenǵalıev.
Aıta keteıik, búgingi otyrys kezinde shtab tekserýshi organdar birigip, bıznestegi tártipti tekserý kezinde bir kún men aıdy belgileýdi usyndy.
