Kásipkerlerdiń eski kassalyq apparattary kádege jaraı ma

NUR-SULTAN. QazAqparat - Jańa talap boıynsha, kásipkerler onlaın baqylaý-kassalyq mashınalarǵa kóshkennen keıin eski kassalyq apparattar paıdalanýǵa jaraı ma? QR Qarjy mınıstrliginiń Memlekettik kirister komıteti kásipkerlerdi tolǵandyrǵan osy suraqqa jaýap berdi, dep habarlaıdy QazAqparat tilshisi.

Komıtetten habarlanǵandaı, 2019 jyldyń sońyna deıin qazaqstandyq kásipkerler fıksatsııalaý jáne málimetterdi joldaý qyzmeti bar baqylaý-kassalyq mashınasyna (BKM) kóshýi tıis. Qysqasha aıtqanda, bul - onlaın BKM. Kassanyń jańa túrine kóshý tártibi «Bıýdjetke túsetin salyqtar jáne ózge de mindetti tólemder týraly» QR Kodeksimen rettelip, Qarjy mınıstriniń buıryǵymen bekitilgen.

«Demek, elimizdegi barlyq kásipkerler osy tártip boıynsha jańa qyzmeti bar kassalyq apparatpen tólem qabyldaýy kerek. Bolmaǵan jaǵdaıda óziniń eski apparatynyń baǵdarlamalyq júıesin ózgertýi tıis. Memlekettik kirister komıtetiniń málimetinshe, 2019 jyldyń 1 mamyryna deıin málimetterdi joldaý qyzmeti joq 255 191 BKM tirkelgen. Onyń basym bóligi, atap aıtqanda 181 566 apparttyń nemese 71,1 paıyzynyń onlaın BKM retinde baǵdarlamalyq júıesin jańartýǵa bolady», - dep habarlaıdy komıtetten.

Telekommýnıkatsııasy joq oryndarda kassalyq apparattardy onlaın-BKM retinde jańartýdyń qajeti joq. Elimizde ondaı kassalardyń sany - 12 myń (jalpy kassalardyń 4,7 paıyzy).

«Joıýǵa nemese telekommýnıkatsııa jelisi joq oryndarda qoldanýǵa bolatyn kassalardyń sany - 32 110 nemese 12,6 paıyz. Onlaın túrdegi BKM-di qoldana bilý - kóleńkeli ekonomıka quraldaryn qysqartýǵa, salyqtyq ákimshilikti jaqsartýǵa, salyqtyq tekseristerdi azaıtyp, memlekettik avtomattandyrý qyzmetin jaqsartýǵa múmkindik beredi. Sonymen qatar, onlaın túrdegi kassalardy qoldaný boıynsha kásipkerlerdi jigerlendirý úshin Salyq kodeksinde salyqty 60 myń teńgege deıin azaıtý jeńildikteri bar», - delingen habarlamada.