Kásipkerlerdiń 76 paıyzy parasyz jumys istep keledi - Alık Shpekbaev

NUR-SULTAN. QazAqparat – Qazaqstanda kásipkerlerdiń 76 paıyzy parasyz jumys istep keledi. Bul týraly Sybaılas jemqorlyqqa qarsy is-qımyl agenttiginiń tóraǵasy Alık Shpekbaev málim etti, dep habarlaıdy QazAqparat tilshisi.

«Parasattylyq ári adaldyq tek memlekettik qyzmette ǵana emes, bıznes te de negizgi ónegeli baǵyt bolýy tıis. Kásipkerler sanasynyń transformatsııasy – ekonomıkanyń básekege qabilettigin damytýdyń mindetti sharty. Eger de jemqorlyqqa qarsy komplaens (sybaılas jemqorlyqqa qarsy is-qımyldyń korporatıvtik baǵdarlamasy) ınstıtýty tolyq kúshinde jumys istese, onda bul protsess eleýli túrde jandanady. Ulttyq kompanııalar men jeke sektorlarda komplaens-ofıtserlerdiń paıda bolýy bıznes parasattylyǵy deńgeıiniń ósýine ońtaıly yqpal etedi. Qazirgi kezde tıisti zań jobasy Parlamenttiń qaraýynda. Bıznestiń evolıýtsııasy úshin mańyzdy alǵysharttar bar ekenin atap ótken jón. Transparency Kazakhstan saýalnamasyna sáıkes, kásipkerlerdiń 76 paıyzy óz bıznesin para bermeı damytyp keledi, ıaǵnı taza quqyqtyq keńistikte qyzmet etýde. Óz kezeginde agenttik jemqorlyqqa qarsy sharalar arqyly adal bızneske qoldaý jasap otyr», - dep atap ótti A. Shpekbaev agenttiktiń 2019 jylǵy jumys qorytyndysyna arnalǵan alqa májilisinde.

Onyń sózine qaraǵanda, agenttik qorǵaýynda búginde jalpy somasy 12 trln teńgeden astam qarjy qurap otyrǵan 400-den artyq joba tur. Olardy otandyq jáne sheteldik ınvestorlar júzege asyrýda. Bıznes isine zańsyz aralasýdyń 358 faktisi anyqtalyp, 400 kásipkerdiń quqyǵy qorǵaldy.

Budan buryn Alık Shpekbaev alqa májilisinde jemqorlyq týraly habarlaǵandarǵa beriletin eń joǵarǵy syıaqy 10,6 mln teńge bolatynyn aıtty.