Kásipkerlerdi jer, salyq máseleleri tolǵandyrady - Tımýr Qulybaev
ShYMKENT. QazAqparat - Elimiz kásipkerlerin áli kúnge jer máselesi tolǵandyrady. Olar óz bıznesin júrgizýde kóptegen kedergilerge tap bolýda.
Bazbiri qurylys júrgizý úshin jer máselesi men qujattardy rásimdeýde qıyndyq kórip jatsa, endi biri belgilengen salyq mólsherin tóleı almaıdy. «Atameken» Ulttyq kásipkerler palatasynyń prezıdıým tóraǵasy Tımýr Qulybaev ońtústikqazaqstandyq kásipkerlermen kezdesýinde osylaı dedi. Kásipkerler palatasynyń aımaqtyq keńesiniń keńeıtilgen otyrysyna qatysqan prezıdıým tóraǵasy qurylys júrgizý úshin telimderdiń túpki maqsatyn ózgertýdiń ózinde qolbaılaý kóp ekendigin atap ótti, dep habarlaıdy QazAqparat HAA tilshisi.
Tımýr Qulybaev sondaı-aq jergilikti bılik tarapynan úlken qoldaýlar kerektigine toqtaldy. Atap aıtqanda, jergilikti taýar óndirýshilerdiń tizimin jasap, olardy ákimdikterdiń kómegi arqyly memlekettik satyp alýlarǵa qatystyrý qajet. «Shaǵyn jáne orta kásipkerlikti damytý úshin Aımaqtyq ınvestıtsııalyq ortalyǵy arqyly nesıe berýdi odan ári jalǵastyrǵan jón. Ásirese, kásipkerlik salasy jaqsy damyǵan óńirde barynsha qolǵabys etýimiz qajet», - dep atap ótti.
«Shymkent qalasy elimizdegi mıllıonǵa jýyq turǵyny bar shahar. Bul qala kásipkerlikti damytý boıynsha basqa óńirlerge qaraǵanda kósh ilgeri bolýy tıis. Óıtkeni munda isker azamattary kóp. Olar tipti Qazaqstannyń basqa óńirlerinde de ınvestıtsııa salyp, kásibin dóńgeletip júr. Eger biz osy Shymkenttiń ózinde bıznes júrgizýge jaǵdaı jasasaq, olar alysqa barmaı-aq, osy jerde kásip ashar edi», - dedi «Atameken» Ulttyq kásipkerler palatasynyń prezıdıým tóraǵasy.
Al, jergilikti kásipkerler bolsa kórshi ózbek eliniń taýar óndirýshilerimen básekeles bolý ońaı emestigin aıtady. Sebebi, ol jaqta salyq kólemi tómen, jumys kúshi arzan. Sonyń esebinen taýarlarynyń baǵasy tym tómen satylady. Olar osy máseleni bir jaqty rettep berýge ótinish bildirdi. Sondaı-aq kúngeılik bıznes ókilderin tarıfterdiń tym qymbat bolýy men tekserý sharalarynyń kóptigi sharshatqan. Otandyq kásipkerlerdiń osy syndy máselelerin tyńdaǵan Ulttyq ekonomıkalyq palatasynyń prezıdıým tóraǵasy men oblys ákimi jıynda kóterilgen problemalardy birlesip sheshýge ýaǵdalasty.
