Kásipkerlerdi jeńildikpen nesıeleý baǵdarlamasyna ózgeris engizildi
«Memleket basshysy Qasym-Jomart Toqaevtyń tapsyrmasyn oryndaý maqsatynda Qazaqstan Ulttyq banki 2020 jylǵy 27 qazandaǵy sheshimimen shaǵyn jáne orta kásipkerlik sýbektilerin jeńildikpen kredıtteý baǵdarlamasyna mynadaı ózgerister engizdi: tótenshe jaǵdaı kezinde zardap shekken iri kásipkerlik sýbektilerin jáne agroónerkásip keshenindegi (AÓK) kásipkerlerdi kredıtteýge qosymsha 200 mlrd teńge bólindi; baǵdarlamany qoldaný merzimi 2021 jylǵy 31 jeltoqsanǵa deıin qosa alǵanda; aqshany ıgerý merzimi – 2021 jylǵy 31 naýryzǵa deıin qosa alǵanda uzartyldy»,– dep habarlady Ulttyq banktiń baspasóz qyzmeti.
Ulttyq bank qabyldaǵan ózgeristerdi iske asyrý jáne baǵdarlamamen qamtýdy keńeıtý maqsatynda QR Ulttyq ekonomıka mınıstrligi «Atameken» ulttyq kásipkerler palatasymen birlesip tótenshe jaǵdaı ýaqytynda barynsha zardap shekken salalardy anyqtady.
Nátıjesinde óndeý ónerkásibinde jáne qyzmet kórsetý salasynda zardap shekken qyzmet túrleriniń tizbesi jasaldy ony QR Ulttyq ekonomıka mınıstrligi 2020 jylǵy 18 qarashada Qazaqstan Ulttyq bankine bekitýge usyndy.
Bul tizbe Qazaqstan Ulttyq banki tóraǵasynyń jáne QR Ulttyq ekonomıka mınıstriniń 2020 jylǵy 18 qarashadaǵy birlesken buıryǵymen bekitildi.
«Tizbege sáıkes tótenshe jaǵdaıdy engizilgennen keıin shyǵynǵa ushyraǵan jáne ekonomıkanyń zardap shekken salalarynda qyzmetin júzege asyratyn iri kásiporyndar jeńildigi bar kredıtterdi alý úshin ekinshi deńgeıli bankterge ótinish berýge quqyly. Bul rette iri kásipkerlik sýbektisi – bir qaryz alýshyǵa 6 mlrd teńge somasynda lımıt belgilendi. Shaǵyn jáne orta bıznes sýbektilerine arnalǵan lımıt – 3 mlrd teńge bop saqtaldy, al jeke kásipker úshin ol soma – 50 mln teńgeden kóp emes. Kásipkerlerdi jeńildikpen kredıtteý úshin qosymsha bólingen 200 mlrd teńgeden 100 mlrd teńgege lımıt bólindi, onyń ishinde 70 mlrd teńge ekinshi deńgeıli bankter arqyly, jáne 30 mlrd teńge «Agrarlyq nesıe korporatsııasy» AQ arqyly bólinedi.
Baǵdarlamaǵa qatysýshylardyń kóbeıýine baılanysty onyń ataýy Kásipkerlik sýbektilerin jeńildikpen kredıtteý baǵdarlamasy dep ózgerdi.
Baǵdarlama Memleket basshysynyń tapsyrmasy boıynsha bıylǵy naýryzda qabyldanǵan jáne tótenshe jaǵdaı kezinde zardap shekken kásipkerlerdi qoldaýǵa baǵyttalǵan.
18 qarashadaǵy derek boıynsha, ekinshi deńgeıdegi bankter 567,4 mlrd teńgege 2 311 ótinish qabyldady. 1 370 shaǵyn jáne orta kásipkerlik sýbektisine (1 168 shaǵyn jáne orta bıznes, 202 jeke kásipkerlik) 455,3 mlrd teńge qaryz berildi, onyń ishinde 101,6 mlrd teńge buryn berilgen qaryzdardy óteýden túsken aqsha esebinen berildi.
Bólingen qarajattyń eń kóp úlesi saýda salasyndaǵy shaǵyn jáne orta bıznes sýbektilerine – 319 mlrd teńge (70%), qurylysqa – 44,9 mlrd teńge (9,9%), óńdeýshi ónerkásipke – 39,8 mlrd teńge (8,7%) tıesili.
