Kásipkerlerdi jeńildetilgen nesıemen qarjylandyrýǵa 36 mlrd teńge bólinedi
Nátıjeli jumyspen qamtý baǵdarlamasy boıynsha túrli maqsattaǵy nesıeniń jyldyq syıaqy mólsheri 6 paıyzdy quraıdy. Sondaı-aq, tıimdi jyldyq syıaqy mólsheri 6,7 paıyzdan aspaıdy.
Nesıeniń somasy, jeńildik merzimi nesıe ónimine baılanysty ártúrli bolady. Qordyń nesıeleý shartynda agrarııler qyzmetiniń ereksheligi, onyń ishinde aýyl sharýashylyǵy jumystarynyń maýsymdylyǵy men tsıkldiligi eskerilgen.
Baǵdarlamaǵa aýyl sharýashylyǵymen jáne aýyl sharýashylyǵyna jatpaıtyn kásip túrlerimen aınalysqysy keletinder, kásibin keńeıtýdi josparlaǵan azamattar qatysa alady. Nesıe alýshylarǵa qoıylatyn birqatar talaptar bar. Atap aıtqanda, kásibin endi bastaıtyn azamattyń kásipkerlik negizderin oqyǵany týraly sertıfıkaty bolýy tıis.
«Týyndaǵan suraqtar boıynsha oblystardaǵy fılıal menedjerlerine habarlasýǵa bolady. Qosymsha Kásipkerler palatasynyń aýdandyq fılıaldarynan da keńes ala alasyzdar», - delingen atalǵan qordyń málimetinde.
«Aýyl sharýashylyǵyn qarjylaı qoldaý qory» AQ - «QazAgro» Ulttyq basqarýshy holdınginiń quramyna kiretin mamandandyrylǵan qarjy-nesıelik uıym. Qordyń negizgi mindeti – agroónerkásip kesheni salasyndaǵy basymdyqqa ıe salalar boıynsha aýyl kásipkerligin qarjylandyrý.
Qor 2013 jyldan beri shaǵyn kásipkerlikti qoldaýǵa baǵyttalǵan birqatar memlekettik baǵdarlamanyń qarjy operatory retinde jumys istep keledi. Kompanııa 2017 jyldan beri 2017-2021 jyldarǵa arnalǵan «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasynyń ekinshi baǵytyn iske asyrýda.