Kásipkerlerdi tekserý moratorııi keıbir dári aınalymyn qadaǵalaýda kedergi - DSM

ASTANA QazAqparat –Retseptimen bosatylatyn dári-dármektiń aınalymyn memlekettik baqylý isin shaǵyn kásipkerlerdi tekserýge jarııalanǵan moratorıı álsiretip tur. Bul týraly QR Densaýlyq saqtaý mınıstri Ajar Ǵınııat Májilis depýtattarynyń saýalyna joldaǵan jaýabynda aıtty, dep habarlaıdy QazAqparat tilshisi.

«Tramadol, tropıkamıd jáne zopıklon halyqaralyq patenttelmegen ataýy bar dárilik zattar retseptimen bosatylýǵa jatady. «Ákimshilik quqyq buzýshylyq týraly» QR Kodeksiniń 426-babynda dárilik zattar retseptisiz bosatylýyna aıyppul kózdelgen. Bul rette retteletin salaǵa memlekettik baqylaý QR Kásipkerlik Kodeksine (budan ári – QR KK) sáıkes júrgiziledi. QR KK-niń 141-babynyń 3-tarmaǵyna sáıkes ekinshi topqa dárilik zattar men medıtsınalyq buıymdar aınalymy ózderine qatysty jospardan tys tekserýler, baqylaý jáne qadaǵalaý sýbektisine (obektisine) barý arqyly jáne barmaı profılaktıkalyq baqylaý men qadaǵalaý júrgiziletin baqylaý jáne qadaǵalaý sýbektileri (obektileri) jatady», - dep jazylǵan mınıstr jaýabynda.

Sondaı-aq ol 2019 jyly mıkrokásipkerlik nysandardy baryp tekserýge jáne profılaktıkalyq baqylaýǵa moratorıı engizilgenin eske salady.

«Qazaqstan Respýblıkasynda tekserýlerge jáne profılaktıkalyq baqylaý men qadaǵalaýdy baryp júrgizýge moratorıı engizý týraly» QR Prezıdentiniń 2019 jylǵy 26 jeltoqsandaǵy № 229 Jarlyǵyna sáıkes shaǵyn kásipkerlik sýbektilerin, onyń ishinde mıkrokásipkerlik sýbektilerin tekserýlerdi jáne profılaktıkalyq baqylaý men qadaǵalaýdy baryp júrgizýge moratorıı engizilgenin atap ótý qajet. Retteletin saladaǵy sýbektilerdiń kópshiligi shaǵyn kásipkerlik sýbektilerine jatady, bul jaǵdaı memlekettik baqylaýdy aıtarlyqtaı álsiretedi», - dep jazady Ajar Ǵınııat.