Kásipkerler jumysyna kedergi keltiretinderge jaza kúsheıtildi

NUR-SULTAN. QazAqparat – Endi quqyq qorǵaý organdary qyzmetkerlerine bızneske aralasqany úshin 2 jyldyń ornyna, 5 jylǵa deıingi bas bostandyǵynan aıyrý jazasy qoldanylýy múmkin. Bul týraly «Antikor ortalygy» alańynda ótken brıfıngte Nur-Sultan qalasy boıynsha sybaılas jemqorlyqqa qarsy is-qımyl departamentiniń basshysy Shyńǵys Qabdýla aıtty, dep habarlaıdy QazAqparat tilshisi.

«Prezıdent óziniń qyrkúıektegi Joldaýynda, memlekettik qurylymdardyń kásipkerlik qyzmetke kez kelgen zańsyz aralasýy, kásipkerlerdiń jumysyna kedergi jasaý memleketke qarsy aýyr qylmys retinde qabyldanýy kerek dep atap ótti. Kásipkerlikti damytý men qorǵaý árqashan el basshylyǵy saıasatynyń basymdyǵy bolyp keledi. Sybaılas jemqorlyqqa qarsy is-qımyl agenttigi de, osy mindetti sheshýge baǵyttalǵan», - deıdi Nur-Sultan qalasy boıynsha sybaılas jemqorlyqqa qarsy is-qımyl departamentiniń basshysy Shyńǵys Qabdýla.

Onyń aıtýynsha, 2018 jyldan bastap, Agenttik Syrtqy ister mınıstrligimen, «Atameken» UKP-men birlesip bıznes pen ınvestıtsııalardy qorǵaý boıynsha arnaıy jobany iske asyryp keledi.

«Bul kásipkerlerdi josyqsyz laýazymdy tulǵalar tarapynan yqtımal qysymnyń, zańsyz syıaqy talaptarynyń aldyn alý maqsatynda memlekettik qurylymdarmen jáne t.b. olardyń ózara árekettesý protsesinde súıemeldeýden turady. Búgingi tańda jalpy somasy 16,2 trln teńgeden asatyn «Sybaılas jemqorlyqqa qarsy súıemeldeýdiń» 613 bıznes-jobasy bar. Bıznesti qorǵaýdy kúsheıtý konteksinde, kásipkerlerdiń jumysyna kedergi keltirmeý maqsatynda Qylmystyq kodekske jaýapkershilikti kúsheıtetin túzetýler engizildi. Endi quqyq qorǵaý organdary qyzmetkerleriniń bızneske aralasqany úshin 2 jyldyń ornyna, 5 jylǵa deıingi bas bostandyǵynan aıyrý jazasyn qoldaný qaýpi bar.

Quqyq qorǵaý organdary basshylyǵynyń jáne sýdıalardyń osyndaı áreketterdi jasaýy odan da qatań jazaǵa – ıaǵnı, 8 jylǵa deıin bas bostandyǵynan aıyrýǵa ákep soǵady», - deıdi ol.