Kásipkerler úshin bank komıssııasy joıylady

NUR-SULTAN. QazAqparat - Qazaqstanda bank komıssııasy jáne fıskaldyq derekter operatorlarynyń qyzmetterine aqy tóleý joıylady. Bul týraly Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Qashyqtan ózara árekettesýge negizdelgen iri bıznestiń kóldeneń monıtorıngi boıynsha pılottyq joba bastaldy. Sonymen qatar, jeke tulǵalardyń múlki men jerine salynatyn salyqtar biriktirildi. Kóppáterli turǵyn úılerdiń menshik ıeleri úshin jer salyǵy alynyp tastaldy. Jeke tulǵalardyń menshigine salyq tóleý yńǵaıly bolý úshin «E-Salyq Azamat» mobıldik qosymshasy iske qosyldy. POS-termınal men onlaın-baqylaý kassalyq mashınasyn qoldanatyn jeke kásipkerlerdiń salyq eseptiligin usynýdan bosatý bóliginde «E-Salyq-business» qosymshasy ázirlenýde», - dedi Erulan Jamaýbaev.

Tutastaı alǵanda mınıstr jeke kásipkerlerdi tirkeý men jabýdy ońaılatý, salyq eseptiligin tapsyrýdy, bank komıssııasyn jáne fıskaldyq derekter operatorlarynyń qyzmetterine aqy tóleýdi alyp tastaý kózdelip otyrǵanyn aıtty.