Kásipkerler sottalýshylardyń raqymshylyqqa iligýine shaǵymdandy
ASTANA. QazAqparat - Túrmede bıznesin ashqandar bilikti mamandarynyń raqymshylyq alyp, merziminen buryn bosap shyǵýyna narazy. Mundaı derekpen QR Bas prokýrorynyń orynbasary Marat Ahmetjanov bólisti dep habarlaıdy QazAqparat.
«Ózim de bıznesmendermen de, atalǵan jumysshylarmen de kezdesken edim. Bıznesmender qazirgi ýaqytta raqymshylyqty, shartty túrde merziminen buryn bosatýdy jıi qoldanasyzdar dep shaǵymdanady. Olardan bilikti mamandar ketip jatyr. Sondyqtan olardy túsinýge de bolatyn shyǵar. Muny olar ókinishpen aıtýda. Biraq, olar bizge bostandyqta da kerek. Olar bizge óz mamandyǵymen, biliktiligimen keledi», - dedi ol QR Bas prokýratýrasynda ótken «Kásipkerlik salasyndaǵy prokýratýra qadaǵalaýy» atty bıznesti qorǵaý jónindegi ekinshi forýmda.
Onyń atap ótýinshe, prokýratýra sottalýshylardyń eńbegin olardy qaıta tárbıeleýdiń úzdik ádisi retinde qarastyrady.
«Úsh jyl burynǵy jaǵdaı óte nashar edi. Óıtkeni, sottalýshylardyń tek jartysy ǵana, onyń ózinde «Eńbek» RMK-da eńbek etetin. Jeke bıznes úshin eshqandaı jaǵdaı bolǵan joq. Kolonııaǵa kirýdiń kúrdeli syzbasy kedergi boldy. Biz olardy jeńildettik. Nátıjesinde kolonııalarda 252 bıznesmen óz isin ashty. Olarda shamamen 3 myń sottalýshy jumys isteıdi», - dedi ol.
Sonymen qatar Marat Ahmetjanov sottalýshylarǵa da óz bıznesin kolonııada ashýǵa múmkinshilik berilgendigin basa aıtty.
«Bul olardy bostandyqqa shyqqannan keıin ómir súrýge yntalandyrady. 56 sottalýshy óz isin ashty. Olar jumysqa 223 sottalýshyny aldy», - dedi Bas prokýrordyń orynbasary.
