Kásipkerler Shardara men Túlkibastaǵy aýrýhanalarǵa ottegi kontsentratoryn alyp berdi

TÚRKІSTAN. QazAqparat – Túrkistan oblysynda jergilikti kásipkerler aýrýhanalarǵa qaýipti indetke shaldyqqan naýqastardy emdeýge qajetti medıtsınalyq qural-jabdyqtardy alýǵa kómek kórsetip jatyr.

Jaqynda osyndaı jomart kásipkerler Shardara men Túlkibas aýdandaryndaǵy aýrýhanalarǵa ottegi kontsentratorlaryn tartý etti. dep habarlaıdy QazAqparat tilshisi.

Shardara aýdany ákimdiginiń uıymdastyrýymen kásipkerler ortalyq aýrýhanaǵa 17 ottegi kontsentrattaryn jetkizip berdi. Qazirgi kezde atalǵan emdeý mekemesinde barlyǵy 20 ottegi apparaty bar. Tynys alýǵa qajetti qural-jabdyqtar naýqastardyń densaýlyǵyn jaqsartý úshin qoldanylýda. Aldaǵy ýaqytta demeýshiler taǵy da ottegi apparattaryn alyp berýge ýáde etip otyr. Ádettegi ottegi balonynan áldeqaıda tıimdi jáne ónimdi bul apparatqa ásirese naýqastar qýanyp, alǵystaryn bildirdi. Al, túlkibastyq kásipkerler pnevmonııamen kúreste asa qajetti ottegi kontsentratorynyń 10 danasyn aýdandyq aýrýhanaǵa tabystady. Atap aıtqanda, Túlkibas aýdanynyń týmalary «Jigitter» kvartetiniń prodıýseri Erǵalı Abdraıymov ottegi kontsentratorynyń 5 danasyn jáne «Nur Max» qurylys kompanııasynyń dırektory Lesaly Abzal esimdi azamat 5 danasyn tartý etti. Olar qandaı da qıyn kezeńde bolmasyn týǵan jerlerine qoldaý kórsetip, qol ushyn sozýǵa daıyn ekendikterin jetkizdi.