Kásipkerler Reseıden jáne Belarýstan taýarlar ákelgen kezinde kedendik júk deklaratsııasyna qatysty shyǵyndardy tólemeıdi
qpannyń 11-i. QazAqparat /Ernur Aqanbaı/ - Keden odaǵy sheńberinde shildeniń 1-nen bastap qazaqstandyq salyq tóleýshiler Reseıden jáne Belarýstan taýarlar ákelgen kezinde kedendik júk deklaratsııasyna qatysty shyǵyndardy tólemeıtin bolady.
Bul týraly búgin Astanada ótken dóńgelek ústelde QR Qarjy mınıstrligi Salyq komıtetiniń tóraǵasy Dáýlet Erǵojın aıtty, dep habarlaıdy QazAqparat.
«2010 jylǵy shildeniń 1-nen bastap kásipkerler úshin Keden odaǵy sheńberinde kedendik rásimdeýler bolmaıdy. Budan bólek tıisti rásimdeýler úshin ártúrli alymdar da alynbaıdy. Máselen, qazir kedendik júk deklaratsııasynyń negizgi betiniń baǵasy - 50 eýro jáne oǵan qosymsha ár bettiń baǵasy - 20 eýro. Shildeniń 1-nen bastap bıznes bul shyǵyndardy tólemeıtin bolady», dedi D. Erǵojın.
Onyń sózine qaraǵanda, Keden odaǵy aıasynda janama salyqtardy alý jónindegi jumys Qazaqstannyń salyq qyzmetiniń enshisine ótedi. «Tıisinshe biz qazir komıtetishilik qaıta qurylymdaý sharalaryn júrgizýdemiz. Mamandandyrylǵan bólimder qurylatyn bolady. Olar Keden odaǵyna qatysty máslelermen shuǵyldanady. Qazirgi ýaqytta jumys istep jatqan mobıldi toptar nyǵaıtylady jáne kúsheıtiledi. Tıisti salyqtar tólenbeıtin taýarlardyń zańsyz ákelýine tosqaýyl qoıýlary úshin biz mobıldi toptardy kúsheıtýge tıispiz», dedi ol.
