Kásipkerler palatasynda shaǵyn jáne orta bıznestiń problemalary talqylandy
NUR-SULTAN. QazAqparat – «Atameken» UKP Prezıdıýmynyń ShOB-ty damytý komıtetiniń ókilderi Ulttyq ekonomıka mınıstri Rýslan Dálenovpen birge tótenshe jaǵdaı ýaqytynda bıznesti qoldaý sharalaryn talqylady, dep habarlaıdy QazAqparat tilshisi.
Onlaın rejımde ótken otyrys barysynda salyq jáne áleýmettik jeńildikter, shaǵyn bıznesti qarjylaı qoldaý jáne jumysqa engizilgen shekteý sharalaryna baılanysty jaldamalay nysandardyń tólemin tóleý máseleleri talqylandy.
Shaǵyn jáne mıkrobıznestiń qarjylyq problemalary týraly aıta kele «Alfa-Bank» AQ basqarýshy dırektory, «Qazaqstannyń kásipkerler forýmy» qaýymdastyǵynyń ókili Damır Kákıev keıbir segmentter boıynsha aınalma qarajat joǵyn alǵa tartty.
«Bólshektik taýar jáne dúkender, HoReCa, kıimder býtıgi, avtojýý, jylýmen qamtý stantsııasy, sán salony, fıtnes pen tigin tsehtary quramyna kiretin shaǵyn bıznesti qarjylandyrý týraly aıtar bolsaq, osynaý búkil segmenttiń qaryz alý úshin kepilge qoıar eshteńesi joq. Tıisinshe olardyń qarjylyq saýattylyǵy aıtarlyqtaı joǵary emes. Osynyń saldarynan ashyq sıpaty joq qarjylyq esep paıda bolady. Usaq bıznestiń 90 paıyzynyń basqarý esebi dápter júzinde júrgiziledi. Jeke tulǵa retinde de, ártúrli baǵdarlama boıynsha da olar tutynýshy nesıesin ala almaıdy. Sebebi zeınetaqy aýdarymy, ıaǵnı resmı tabys kózi joq. Al eger biz food/non-food sanaty týraly aıtar bolsaq, dıstrıbıýtorlardyń ózi konsıgnatsııany qurmaıdy», - dedi Damır Kákıev.
Onyń aıtýynsha, memlekettik baǵdarlamalardyń kóbi ortasha segmentke, orta bıznes pen shaǵyn bıznestiń joǵary segmentine arnalǵan. Osyǵan baılanysty Damır Kákıev memlekettik baǵdarlama aıasynda shaǵyn jáne mıkrobıznestiń segmentteriniń klasterızatsııasyn júrgizýdi usynady.
