Kásipkerler palatasy jerlerinen aıyrylǵaly otyrǵan bıznesmenderge sotta arasha tústi
QYZYLORDA. QazAqparat-Qyzylorda oblysy Kásipkerler palatasy Qazaly aýdandyq fılıaly aýdandaǵy úsh birdeı kásipkerdiń quqyǵyn sotta qorǵap, jer ýchaskelerin saqtap qaldy, dep habarlady «QazAqparat» HAA tilshisi oblystyq kásipkerler palatasyna silteme jasap.
Qazaly aýdandyq fılıal dırektory Ermek Aımahanovtyń aıtýynsha, Kásipkerler palatasynyń Qazaly aýdandyq fılıaly qurylǵan kúninen bastap 30-dan astam kásipkerdiń quqyǵyn qorǵap, tıisti sharalar qabyldady. Bul rette, jergilikti prokýratýra organdarymen áriptestik qarym-qatynas júıeli jolǵa qoıylǵan. Palata janynan «Prokýror kabıneti» de ashyldy.
«Aptasyna eki ret kásipkerler bizdiń ǵımaratta prokýrormen kezdesip, problemasyn atalmysh organ ókilderine de aıta alady. Palatadaǵy Kásipkerlerge qoldaý kórsetý ortalyǵynyń keńesshileri bıznesmenderge quqyqtyq keńes berýmen qatar, olardyń múddesin qorǵap, sot otyrystaryna da qatysýda. Máselen, Qazaly aýdanynyń úsh kásipkeriniń problemasy boıynsha keńesshi Shyńǵys Qadirov Qyzylorda oblysynyń mamandandyrylǵan aýdanaralyq ekonomıkalyq sotyna qatysyp, nátıjesinde sot protsesi kásipkerdiń paıdasyna sheshildi», - deıdi ol.
Aýdandyq fılıal dırektory aıtyp otyrǵan másele mynaý. Qyzylorda oblysynyń Jerdiń paıdalanylýy men qorǵalýyn baqylaý basqarmasy maqsaty boıynsha paıdalanbady degen jeleýmen Qazaly aýdanyndaǵy 3 kásipkerdiń (jalpy aýmaǵy 1500 sharshy metr) jerin májbúrlep alyp qoıý týraly oblystyq mamandandyrylǵan aýdanaralyq ekonomıkalyq sotyna talap aryz bergen. Atalmysh úsh kásipkerdiń biri Temirhan Tájmaǵanbetov. Quzyrly mekeme kásipkerdi «aýyl sharýashylyǵy ónimderiniń dúkenin ashý» maqsatymen alynǵan 400 sharshy metr jerdi maqsatqa saı paıdalanbaı otyr dep sotqa bergen. Qujattarynyń barlyǵy durys bola tura basyna is túsken Temirhan Kásipkerler palatasynyń Qazaly aýdandyq fılıalyna baryp, quqyǵyn qorǵaýdy suraǵan.
Bul máselemen Kásipkerlerge qoldaý kórsetý ortalyǵynyń keńesshisi Shyńǵys Qadirov aınalysty. Sotta Temirhan Tájmaǵanbetovtiń múddesin qorǵaǵan keńesshi tıisti dáleldemeleri bar qujattardy kórsetkennen keıin, sot talapkerdiń kásipkerden jerdi májbúrlep alyp qoıý týraly talap-aryzyn qanaǵattandyrýdan bas tartty. Nátıjesinde, kásipkerdiń jerin ózinde qaldyrýǵa sheshim shyǵaryldy.
