Kásipkerler palatasy ekonomıkalyq tergeýler boıynsha bıznes quqyǵyn qorǵaıtyn arnaıy ókiletti ýákil bekitýdi suraıdy
Búgin Kásipkerler palatasy men Almaty oblysy boıynsha Memlekettik kirister departamentiniń Ekonomıkalyq tergeýler qyzmeti arasynda yntymaqtastyq týraly memorandýmǵa qol qoıyldy.
Kásipkerler palatasynyń dırektory Lázzat Shyńǵysbaevanyń sózine qaraǵanda, byltyr palatanyń tek quqyqtyq blogynda kásipkerlerden 636 ótinish tirkelip, olardyń basym kópshiligi oń sheshim tapqan. Sarapshylar 155 sot isine qatysyp, olardyń 108-i (70%) bıznes paıdasyna sheshilgen. Osy ýaqyt aralyǵynda palata kásipkerlerdiń 1,1 mlrd teńge kólemindegi qarajatyn qorǵaǵan.
«Yntymaqtastyq tek qaǵaz júzinde qalmaýy, bul baǵytta júıeli túrde jumys jasalýy qajet. Mysaly, prokýratýra organdarymen tıimdi yntymaqtastyq ornatyldy. Sol sebepti, kásipkerlerdiń baqylaý-tergeý organdary qyzmetine degen kózqarasy ózgerdi. Ár organnyń palataǵa qatysty bekitilgen qyzmetkeri bar. Olar únemi bıznestiń ózekti máselelerine arnalǵan dóńgelek ústelderge qatysyp otyrady. Osyndaı qarym-qatynasty Memlekettik kirister departamentimen de ornatqymyz keledi. Bul úshin departamenttiń Ekonomıkalyq tergeý qyzmetinde kásipkerler quqyǵyn qorǵaýǵa arnalǵan ókiletti ýákil bekitseńizder», dedi óńirlik palata basshysy.
Óz kezeginde Memlekettik kirister departamenti basshysynyń orynbasary Dáýlet Aqylbekov, Ekonomıkalyq tergeý baǵytynda birlesken jumysqa ázir ekenin, kásipkerler quqyǵyn qorǵaý jónindegi ýákildi bekitý máselesine oń kózqarasta ekenin jetkizdi.
«Kelisim kásipkerlik klımatty jaqsartýǵa, bıznes múddelerin quqyqtyq turǵydan qorǵaýdy qamtamasyz etýge jol ashady. Birlesken is-áreketter Almaty oblysyndaǵy kásipkerlikti odan ári damytýǵa jáne onyń ósip-órkendeýiniń negizin qalyptastyrýǵa yqpal etedi degen senimdemin», dedi Dáýlet Aqylbekov. Onyń sózine qaraǵanda, zańsyz kásipkerlikpen kúres te jandana túsetin bolady.
Aıta keterligi, byltyr zańsyz kásipkerlikke qatysty qylmystyń 16 faktisi tirkelip, olardyń barlyǵy sotqa joldanǵan.