Kásipkerler palatasy bıznes ókilderi úshin dıalog alańyna aınaldy
Bul týraly oblystyq kásipkerler palatasynyń dırektory Ǵalymbek Jaqsylyqov aıtty, dep habarlady «QazAqparat» HAA tilshisi.
Palata basshysy 2016 jyl nátıjeli qorytyndylanǵandyǵyn jetkizdi. Ótken jyly palataǵa kelgen barlyǵy 5995 azamatqa 12257 keńes berildi, 1710 kásipkerge servıstik qyzmet kórsetildi.
«Ásirese aımaqta «Bıznes mektep» komponentine suranys joǵary. 1007 qyzylordalyq «Bıznes-keńesshi» oqý kýrsynan, 120 -«Bıznes-Ósim», 65 adam «Jobalyq oqytý» baǵdarlamalarynan ótti. Nátıjesinde jalpy quny 888,7 mln.teńge turatyn 186 joba qarjylandyryldy», - deıdi Palata basshysy.
Palatanyń janynan «Býhgalterler klýby», «Zańger keńesi» Klýby quryldy. Munymen qosa, aýdandar men qalada «Prokýror kabınetteri» ashyldy.
Munan ózge, ótken jyly 200-den astam kásipkerdiń quqyǵy qorǵalyp, bıznes ókilderi 200 mln.teńgege jýyq qarjysyn saqtap qala aldy. Palata zańgerleri 50-den astam sot otyrysyna qatysyp, olardyń 80 paıyzy kásipkerlerdiń paıdasyna sheshildi.
«Aıta ketý kerek, qazir aımaqtaǵy kásipkerler palata zańgerleriniń biliktiligin joǵary baǵalaýda. Buǵan bizdiń zańgerlerimizdiń sońǵy kezde sot protsesterine jıi qatysyp, bıznes ókilderiniń qorǵaýshysy retinde qyzmet kórsetip júrgendigi dálel. Bizdiń zańgerler kórsetetin qyzmetterdiń barlyǵy tegin ekenin eskersek, bul kásipkerler úshin qarjylyq turǵydan tıimdi. Sebebi, kásipker úshin qorǵaýshy jaldap, qorǵaýshynyń bir ǵana talap aryz jazyp, sot protsesiniń bir ǵana otyrysyna qatysýy - eń azy 100 000 (júz myń) teńgeni qajet etedi. Bizdiń zańgerler 1 jylda 50 sot otyrysyna qatysty. Endi ózderińiz de esepteı berińizder, bir jylda kásipkerler qansha qarjyny únemdep qala alǵanyn», - deıdi Ǵalymbek Jaqsylyqov.
Kásipkerler palatasy ótken jyly aýyl sharýashylyǵy kooperatıvterin qurý sharasyna da belsendi qatysyp, óz úlesterin qosty. Oblys boıynsha qurylǵan 114 aýyl sharýashylyǵy kooperatıviniń 11-i palata ókilderiniń súıemeldeýimen quryldy.
Onyń ústine, 2016 jyly aýyl sharýashylyǵy salasy mamandarynyń biliktiligin arttyrýǵa da asa mán berildi. Agroquzyr ortalyǵymen birge oblysta 33 oqytý semınary ótkizildi. Sharanyń mańyzdylyǵy sonda - mamandar shet elderden shaqyrtyldy.
Palata mamandarynyń súıemeldeýimen «Saýda úzdigi - 2016» respýblıkalyq konkýrsyna qatysqan «Araı» sporttyq-saýyqtyrý kesheni 2-orynǵa, Shıeli aýdanyndaǵy «Ábdimanap» bazary 3-orynǵa ıe boldy.
Sondaı-aq, «Atameken» UKP-nyń uıymdastyrýymen ótken «Altyn sapa» syılyǵy men «Qazaqstannyń úzdik taýary - 2016» respýblıkalyq kórme-baıqaýynda Qyzylorda oblysynan «Syr marjany» JShS «Atamekenniń» arnaıy taǵaıyndaǵan «Іsker - 2016» syılyǵyn aldy.