Kásipkerler palatasy 6 aıda 150 kásipkerdiń quqyǵyn qorǵady-Qyzylorda
QYZYLORDA. QazAqparat - Bul týraly Kásipkerler palatasy Kásipkerlerdiń quqyǵyn qorǵaý jáne ákimshilik kedergilerdi azaıtý bóliminiń basshysy Erlan Ábdikerov aıtty, dep habarlady QazAqparat tilshisi.
Erlan Ábdikerovtiń aıtýynsha, Palataǵa jyl basynan beri bıznes ókilderinen 97 ótinish túsken. Nátıjesinde 48 ótinish boıynsha oń sheshim qabyldanyp, 150-den astam kásipkerdiń quqyǵy qorǵaldy. Kásipkerler palatasy zańgerleriniń aralasýymen bıylǵy jyldyń 6 aıynyń ózinde kásipkerlerdiń 217 mln.teńgesin saqtalyp qaldy jáne 8 laýazymdy tulǵa tártiptik jaýapqa tartyldy.
«Túsken shaǵymdardyń 22 paıyzy memlekettik jáne quqyq qorǵaý organdarynyń qyzmetine, 22 paıyzy kvazımemlekettik organ qyzmetine, 18 paıyzy jer qatynastary, 10 paıyzy salyq salalaryna qatysty», - deıdi Kásipkerlerdiń quqyǵyn qorǵaý jáne ákimshilik kedergilerdi azaıtý bóliminiń basshysy.
Erlan Ábdikerov oń sheshilgen máselelerdiń mańyzdylaryna da toqtalyp ótti.
«QazTransGazAımaq» AQ Qyzylorda oblystyq fılıaly tarapynan kásipkerge salynǵan 25 mln. teńgeden astam aıyppul joıylǵan;
QR Ulttyq ekonomıka mınıstrligi Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń Qyzylorda oblystyq departamenti tarapynan kásipkerge salynǵan 37 mln.teńge aıyppul joıylǵan;
«Tártiptik jaýapqa tartylǵan memlekettik organ ókilderi: kóshi-qon polıtsııasy qyzmetkerleri, Aral aýdanynyń memlekettik kirister basqarmasynyń basshysy men bas mamany, Aral aýdanynyń jergilikti polıtsııa ınspektory. Bul azamattarǵa «atqaryp otyrǵan laýazymyna sáıkes emes», «sógis», «eskertý» berildi», - dep atap ótti Erlan Ábdikerov.
Munan ózge, Kásipkerler palatasy zańgerleri tarapynan jyl basynan beri «Atameken» UKP-na qoldanystaǵy zańnamalyq aktilerge ózgerister men tolyqtyrýlar engizýge qatysty 20 usynys joldanǵan.
Eger kásipker retinde quqyǵyńyz buzylǵan bolsa onda Kásipkerler palatasynyń zańgerleri Sizdi qorǵaýǵa ázir. Ol úshin 8 /7242/ 40-09-81 /ishki 4319/ baılanys telefonyna habarlasýyńyzǵa nemese Qyzylorda qalasy Áıteke bı kóshesi 28 mekenjaıda ornalasqan Kásipkerler palatasyna kelip, ótinish qaldyrýǵa bolady.
