Kásipkerler Nur-Sultanda birqatar kásiporyndar jumysyn jandandyrýdy usyndy
NUR-SULTAN. QazAqparat - Elorda ákimi Altaı Kólginov bıznes, memlekettik organdar, «Atameken» QR Ulttyq kásipkerler palatasy, «Damý» kásipkerlikti damytý qory» AQ jáne bank ókilderimen onlaın-konferentsııa ótkizdi, dep habarlaıdy qalalyq ákimdiktiń baspasóz qyzmeti.
Ashyq dıalog barysynda kásipkerler kásiporyndardyń jumysyn birtindep qalpyna keltirý boıynsha óz usynystaryn aıtty. Máselen, turmystyq tehnıkany satatyn dúkenderdi ashý týraly usynys aıtyldy.
Turǵyndarda tońazytqysh, salqyndatqysh, plıta jáne t. b. satyp alý qajettiligi týyndap otyr. Sonymen birge arnaıy halyqqa qyzmet kórsetý ortalyqtaryn barynsha onlaın rejımge kóshirip, ashý usynyldy. Onlaın-konferentsııaǵa qatysýshylar onlaın-servısterdi damytý men memlekettik qyzmetterdi elektrondyq formatqa barynsha kóshirý qajettigin atap ótti. «Atameken» QR UKP Basqarma Tóraǵasy Abylaı Myrzahmetov usynystar eskeriletindigin aıtty. Kásipkerlerdiń usynystary Tótenshe jaǵdaı rejımin qamtamasyz etý jónindegi memlekettik komıssııanyń otyrysynda talqylanady.
