Kásipkerler nesıesin 90 kúnge deıin tólemeı, keıinge shegerýge múmkindik aldy

NUR-SULTAN. QazAqparat – Bankter men mıkroqarjy uıymdary qarjylyq jaǵdaıy nasharlaǵan kásipkerler úshin qaryz tólemin 90 kúnge deıin shegerýi tıis. Mundaı jeńildik týraly Úkimet otyrysynda Qarjy naryǵyn retteý jáne damytý agenttiginiń tóraǵasy Madına Ábilqasymova aıtyp berdi, dep habarlaıdy QazAqparat tilshisi.

«QR bankter jáne bank qyzmeti týraly zańynyń 34-babynyń 3-tarmaǵyna jáne mıkroqarjylyq qyzmet týraly QR zańynyń 3-babynyń 6-tarmaǵyna sáıkes kredıtorlar shart talaptaryn qaryz alýshy úshin jaqsartqan jaǵdaıda olardy birjaqty tártippen ózgertýge quqyly. Osyǵan oraı bankter jáne mıkroqarjylyq uıymdar tótenshe jaǵdaıdyń engizilýine baılanysty qarjylyq jaǵdaıy nasharlaǵan jeke kásipkerler men ShOB sýbektilerine negizgi borysh pen syıaqyny qosa alǵanda tólem merzimin 90 kúnge deıingi merzimge keıinge qaldyrý jumysyn júrgizýi tıis», - dedi Madına Ábilqasymova Úkimet otyrysynda.

Agenttik tóraǵasynyń aıtýynsha, bankter men nesıe naryǵynyń basqa da sýbektileri atalǵan sharalardy halyq pen bızneske qolaıly bolýy úshin barynsha qashyqtan qatynas jasaý arqyly iske asyrady. Osylaısha qaryz alýshylarmen ózara is-qımyl jasaýdyń tártibi men tetikteri aıqyndalady.

Eske sala ketsek, buǵan deıin Mádına Ábilqasymova bankte kredıti jáne lombardta qaryzy bar azamattarǵa qandaı jeńildikter jasalatynyn málim etken edi.