Kásipkerler memorgandarǵa qatysty jıi shaǵymdana bastady - UKP

NUR-SULTAN. QazAqparat – «Atameken» ulttyq kásipkerler palatasy basqarma tóraǵasynyń orynbasary Erbol Óstemirov kásipkerlikti retteý salasyndaǵy negizgi úrdister týraly aıtyp berdi, dep habarlaıdy QazAqparat tilshisi.

«Ótken jyly Memleket basshysy retteý is-sharalaryna qatysty tıisti tapsyrma bergen bolatyn. Bul óz kezeginde barsha retteý salasyn qaıta qaraýdy bildiredi. Sońǵy jyldary tıisti ońtaıly jumys júrgizildi. Kásipkerlerge qolaıly jaǵdaı jasaý úshin jyl saıyn zań jobalary qabyldanyp keledi. Jalpy, osy reformalar nátıjesinde ruqsatnamalar sany bizde 74 paıyzǵa qysqardy, ıaǵnı buǵan deıin 1,2 myńnan astam ruqsatnamalar bolsa, qazir 278-i qaldy», - dedi E. Óstemirov onlaın rejımde ótken konferentsııada.

Onyń aıtýynsha, bızneske qatysty talaptar da azaıdy.

«Memlekettik qadaǵalaý salasy ońtalandyryldy, profılaktıkalyq baqylaý túsinigi engizilip, tekserýler merzimi qysqardy. Eger eldiń ımıdji úshin oń nátıjege toqtalsaq, Dúnıejúzilik bank júrgizetin Doing business reıtıngi bar. Osy reıtıngide Qazaqstan sońǵy jyldary 50 pozıtsııaǵa kóterildi», - dedi spıker.

Sonymen qatar ol kásipkerlerge qatysty retteý salasynda máseleler bar ekenin atap ótti. Bul turǵyda ákimshilik jaýapkershilikke tartylǵan kásipkerler sany artqan. Statıstıka boıynsha 2015 jyldan beri laýazymdy tulǵalar men memlekettik organdar is-qımylyna shaǵym túsirý boıynsha ótinimder kóbeıgen.