Kásipkerler mektep ashanalarynda uzaq merzimde jumys isteýlerin surap otyr

ASTANA. QazAqparat - Kásipkerge mektep ashanasynda uzaqmerzimdi shartpen jumys isteýge múmkindik berý qajet. Bul týraly búgin Qyzylorda oblystyq kásipkerler palatasynyń dırektory Ǵalymbek Jaqsylyqov aıtty, dep habarlaıdy QazAqparat tilshisi.

«Búgin «Nur Otan» partııasynyń jańa jobalary tanystyryldy. Kórip otyrǵanymyzdaı, onyń ishinde kásipkerlikti damytýǵa kóp kóńil bólingen. Men kásipker retinde de, qarapaıym azamat retinde de tolyqtaı qoldaımyn. Atap aıtqanda, partııa «Atameken» UKP-men qazaqstanstandyqtar úshin paıdaly birqatar áleýmettik jobalardy iske asyrǵaly otyr. Bul - mektep ashanalaryn jańǵyrtý jáne mekteptegi taǵamdaný sapasyn arttyrý. Barlyǵymyz da balalarymyzdyń deni saý jáne  tabysty ósip, jetilýin qalaımyz. Sondyqtan bıznes bul jobaǵa belsene kirisýge daıyn», - dedi ol Elbasy Nursultan Nazarbaevtyń tóraǵalyǵymen ótip jatqan «Nur Otan» partııasy Saıası keńesiniń keńeıtilgen otyrysynda.

Onyń aıtýynsha, Qyzylorda oblystyq kásipkerler palatasyna mektep ashanasynda jumys isteıtin kásipkerler  kelip, óz shaǵymdaryn jıi aıtady.

«Biz olarmen tolyqqandy jumys jasap jatyrmyz. Biraq, qazirgi zańnamalarǵa sáıkes mektep  basshylyǵy jyl saıyn tender ótkizedi. Sondyqtan kásipker tenderge qatysý úshin úsh aı ýaqytyn shyǵyndaıdy da, odan keıin alty aı ǵana jumys jasaıdy. Osyǵan baılanysty kásipker keler jyly taǵy da tender utyp alýyna senimsiz bolǵandyqtan qarajat salýdan tartynady. Qazirgi tańda kásipkerlerge uzaqmerzimdi sharttar uıymdastyrý, uzaqmerzimge shartpen jumys jasaý múmkindigin berý máselesin qarastyryp jatyrmyz», - dedi Ǵalymbek Jaqsylyqov.