Kásipkerler mal sharýashylyǵyna qajet maman daıarlaıtyn mektep ashýdy usyndy
PETROPAVL. QazAqparat – Soltústik Qazaqstan oblysynda kásipkerler jergilikti aýyl sharýashylyǵy ǵylymı-zertteý ınstıtýtyn damytyp, onyń janynan mal sharýashylyǵyna qajet mamandar daıarlaıtyn mektep ashýdy usyndy, dep habarlaıdy QazAqparat tilshisi.
«Atameken» UKP tóralqa tóraǵasy Raıymbek Batalovpen kezdesýde SQO fermerleri aýyl sharýashylyǵy ǵylymı-zertteý ınstıtýtyn oblystyń basqarýyna berý jaıynda bastama kóterdi. Sharýalar qazir qajetti keńes alý úshin sheteldik mamandardyń kómegine júginedi.
«Qazaqstanda ǵylym óndirispen birge júrýi kerek. Sondaı-aq tájirıbeli kadrlardy saqtap, bilikti jas mamandardy daıarlaý mańyzdy. Aǵa býyn ketse jumys isteıtin mamansyz qalamyz», - deıdi kásipkerler.
Osyǵan oraı fermerler ınstıtýt bazasynda mal sharýashylyǵyna qajet mamandardy ázirleıtin mektep ashýdy usyndy.
«Bıznestiń bul bastamasyn Úkimet jáne Aýyl sharýashylyǵy mınıstrligine pılottyq joba retinde usynamyz. Bul –kásipkerlerdiń qalaýy», – dedi Raıymbek Batalov.
Qyzyljar aýdanynda ornalasqan aýyl sharýashylyǵy ǵylymı-zertteý ınstıtýtynyń 50 jyldyq tarıhy bar. Qazir munda 30-dan astam ǵylymı qyzmetker, bir ǵylym doktory jáne jeti kandıdat eńbek etedi. Biraq qarjylandyrýdyń jetkiliksizdiginen ınstıtýt óz áleýetin tolyq kólemde paıdalana almaı otyr.
